Vendosni fjalën kyçe....

Programi i Kryemadhit për Arsimin: 5% të PBB-së do e çojmë në Arsim



Kryetarja e LSI-së, Monika Kryemadhi ka zhvilluar sot në Elbasan një tryezë për arsimin, ku ka diskutuar për programin e partisë së saj për Arsimin.

Kryemadhi tha se arsimi është në themel të programit të forcës politike që ajo drejton dhe synon që në arsim të investohet 5% të Prodhimit të Brendshëm Bruto.

“Arsimi është në themel të programit dhe vizionit të LSI-së, pasi kushdo që mendon për të ardhmen, duhet të mendojë edhe për arsimin e të rinjve tanë. Një arsim cilësor, jo me fjalë, por ku në thelb të programit tonë ne kemi 5% të Prodhimit të Brendshëm Bruto.”- deklaroi Kryemadhi.

Gjatë fjalës së saj, zonja Kryemadhi preku dhe ligjin për Arsimin e lartë, për të cilin tha se do të shqyrtohet me stafin akademik dhe studentët.

FJALA E KRYEMADHIT

Dua të falenderoj të gjithë grupin e punës, të gjithë pedagogët që kanë punuar për programin e arsimit, por mbi të gjitha edhe studentët.

Unë ndihem kaq mirë që analiza profesionale e themelit të programit tonë politik, për Shqipërinë e pas 25 Prillit, po mbahet sot në Elbasan, në një qytet që kaq shumë e do arsimin dhe kulturën.

E kam ndjerë këtë në çdo komunikim timin me qytetarët në Elbasan, të çdo moshe, nga qendra e qytetit deri në skajin më të largët.

Por jo vetëm në Elbasan, pas nevojës për punësim, gjëja e dytë për të cilën shqetësohen më shumë qytetarët tanë është edukimi i fëmijëve. Shqiptarët e dinë se nuk ka pasuri më të madhe se dija, nuk ka armë më të fortë se aftësia për t’u përballur me sfidat e të ardhmes, ndaj edhe arsimi i fëmijëve tanë nuk është më pjesë e kompromisit, por përkundrazi është sfidë e familjeve tona dhe sfidë e LSI-së si forcë politike.

Për ne si LSI, e cila është partia e të rinjve dhe të rejave, vendi mund të shërohet vetëm nga të rinjtë. Sot sfidat e vendit janë nga më të mëdhatë që kemi kaluar: kriza e punësimit, ndalimi i shpopullimit, kthimi i besimit tek të rinjtë, të cilët kërkojnë zgjidhje afatgjata, vizionare, por edhe të menjëhershme.

LSI e gjen zgjidhjen tek arsimi cilësor për të rinjtë dhe të rejat, si dhe dhe punësimi dinjitoz për një të ardhme dinjitoze për ta.

Arsimi është në themel të programit dhe vizionit të LSI-së, pasi kushdo që mendon për të ardhmen, duhet të mendojë edhe për arsimin e të rinjve tanë. Një arsim cilësor, jo me fjalë, por ku në thelb të programit tonë ne kemi 5% të Prodhimit të Brendshëm Bruto.

Një arsim cilësor, ku ne kemi vendosur taksën e të ardhmes, ku taksohen me 1% të fitimit të tyre të gjitha kompanitë e mëdha, duke qenë edhe vetë ato përfituese me burime njerëzore, të cilët do të jenë të aftë për tregun e punës dhe në konkurrencë. Për një arsim cilësor, jo me fjalë, por me rritje dyfish të pagave për mësuesit, që për ne është shumë e rëndësishme që mësuesit të jenë edukatorë të brezit të ri dhe jo mercenarë politik.

Për arsim cilësor, ku Ligji për Arsimin e Lartë do të shqyrtohet në bashkëpunim të ngushtë me vetë stafin akademik dhe studentët. Do të jenë ata që do ta hartojnë, do të jenë ata që do të krijojnë mundësinë për të pasur një universitet jo vetëm autonom, por edhe të pavarur politikisht, si dhe të ketë mundësinë e një pavarësie ekonomike, për të krijuar një universitet cilësor dhe konkurrent.

Një arsim cilësor, me kurrikula të lidhura me ekonominë e vendit.  Një arsim cilësor, që shpenzimet e studentëve, të cilat ne synojmë t’i përgjysmojmë, të jenë të përballueshme jo vetëm për studentët shqiptar, por edhe për familjet e tyre. 

Arsim cilësor për LSI do të thotë punësim që në bankat e shkollës. Programi “Mëso dhe fito” i cili është një nga programet më të përkrahura sot nga rinia shqiptare. Do të thotë punë të garantuar, paga dinjitoze, taksa të ulëta. Arsimi cilësor përmirëson pjesëmarrjen në politikë dhe krijon hapësira politike për të rinjtë tanë, gjë që është e domosdoshme për t’i dhënë fund njëherë e përgjithmonë tranzicionit politik në Shqipëri, pas 30 viteve.

Arsimi cilësor sjell ekonomi të hapur, konkurrencë të ndershme, mundësi punësimi për të gjithë. Arsim cilësor do të thotë zhvillim bashkëkohor të bujqësisë, të industri agro përpunimit. Do të thotë shërbim shëndetësor të zhvilluar dhe jo emigrim të mjekëve e infermierëve në Gjermani.

Pra arsim cilësor do të thotë familje e re e lumtur, për të cilën ne e kemi të domosdoshme sot. Arsim cilësor do të thotë fuqizim i gruas në shoqërinë tonë. Arsim cilësor do të thotë një Shqipëri dinjitoze, me integritet dhe një Shqipëri europiane për të cilën ne aspirojmë. Për ne arsimi cilësor do të thotë të kesh besim tek të rinjtë dhe të rejat.

Unë jam shumë krenare që të gjithë kontribuuesit e këtij programi për arsimin dhe  të gjithë ju profesorë dhe profesionistë këtu në tryezë, si dhe gjithë atyre mijëra mësuesve dhe studentëve që janë angazhuar në hartimin e këtij programi, u janë bashkuar angazhimit dhe pasionit tonë për të hartuar një program të tillë, i cili në fund të ditës për ne është një meritë, por mbi të gjithë edhe një mision të cilin ne duhet ta realizojmë, jo vetëm për të rinjtë dhe të rejat tanë, por për të ardhmen e vendit tonë.

Vullneti ynë politik në qeverisje do të fokusohet për ta bërë realitet këtë program, i cili është shumë i thjeshtë, shumë real, i prekshëm dhe shumë i mundshëm, në mënyrë të tillë që t’u krijojmë mundësinë të rinjve dhe të rejave tanë, që të kenë një arsim cilësor, një sistem arsimor të detajuar, por të prekshëm dhe të domosdoshëm për të ecur përpara dhe për të qenë të barabartë me të gjithë bashkëmoshatarët e tyre, jo vetëm në Rajon, por edhe më gjerë.

Unë ju uroj suksese dhe ju falenderoj jashtëzakonisht shumë për kontributin. Dua të falenderoj të gjithë pedagogët që na e bënë të mundur, edhe ata që nuk janë sot këtu, por që kanë bërë realizimin e një programi shumë të thjeshtë, shumë të prekshëm dhe të domosdoshëm, për të qenë i pranueshëm jo vetëm nga studentët, por edhe nga stafi i gjerë akademik.


Leave a Reply

Your email address will not be published. Required fields are marked *