Ambasada shqiptare në Turqi ka reaguar pas tërmetit të fuqishëm me magnitudë 6.6 që goditi sot Turqinë perëndimore.
Ambasada u bën thirrje shtetasve shqiptarë që gjenden në zonën e rrezikut, të transferohen në një zonë të sigurt ndërsa vë në dispozicion edhe një numër telefoni për raste emergjence.
“Një tërmet i fortë ka goditur Turqinë perëndimore,pranë zonës së Izmirit. Ambasada shqiptare në Ankara i bën thirrje shtetasve shqiptarë të gjendur në zonë të transferohen në një zonë të sigurt dhe ka vendosur në dispozicion numrin e telefonit +90 5495611985 për rast emergjence”, thuhet në deklaratën e Ambasadës shqiptare në Turqi.
Ambasadori i Shqipërisë në Ankara, Kastriot Robo, tha më herët në një prononcim për televizionin “Neës 24” se në zonën e Izmirit, ka shumë shqiptarë por deri tani nuk raportohet për të lënduar.
“Ishte një tërmet shkatërrues. Dyshohet se nën rrënoja ka viktima. Në Izmir dhe rrethinat e tij ka shumë shqiptarë. Nuk kemi raportime për shqiptarë të lënduar”, është shprehur ambasadori.
Ministri i Shëndetësisë Fahrettin Koca ka konfirmuar se katër njerëz kanë humbur jetën nga tërmeti dhe 120 njerëz të tjerë kanë mbetur të plagosur nga tërmeti.
