Me 92 vota pro, pa asnjë kundër apo abstenim, Kuvendi i Shqipërisë miratoi unanimisht një deklaratë ku e cilëson si “shtrembërim të rëndë historik” kërkesën e Prokurorisë Speciale në Hagë për dënimin me nga 45 vite burg të Hashim Thaçit, Jakup Krasniqit, Kadri Veselit dhe Rexhep Selimit.
Deklarata e përbashkët, e propozuar nga socialistët dhe e hartuar nga dy ish-ministra të Jashtëm, Igli Hasani dhe Tritan Shehu, shpreh dënimin e ashpër të forcave politike shqiptare ndaj procesit që po zhvillohet në Gjykatën Speciale.
Në tekstin e lexuar nga Igli Hasani, theksohet se Kuvendi, duke iu referuar “të vërtetës historike të luftës së UÇK-së”, e konsideron këtë ushtri si një lëvizje legjitime çlirimtare që luftoi për të drejtat e njeriut. Sipas deklaratës, kërkesa e Prokurorisë rrezikon të deformojë historinë, duke barazuar luftën për liri dhe mbijetesë të popullit të Kosovës me krimet e regjimit serb, të cilit i atribuohen spastrim etnik dhe krime kundër njerëzimit.
Kuvendi shpreh mbështetje të pakufizuar për atë që e quan “luftë të drejtë” të UÇK-së dhe i drejtohet Dhomave të Specializuara në Hagë, komunitetit ndërkombëtar dhe institucioneve të drejtësisë ndërkombëtare që, përmes një procesi të drejtë dhe të paanshëm, të shpallin pafajësinë e katër ish-komandantëve, duke mos cenuar dinjitetin e luftës çlirimtare të Kosovës.
Në të njëjtën linjë u shpreh edhe bashkëshkruesi i deklaratës, deputeti i opozitës Tritan Shehu, i cili e cilësoi procesin në Hagë si “farsë” dhe tha se deri më tani nuk është paraqitur asnjë provë konkrete për akuzat e ngritura ndaj tyre.
Deklarata e miratuar i bën thirrje gjithashtu qeverive të Shqipërisë dhe Kosovës që të bashkëpunojnë ngushtë në një aksion diplomatik dhe politik në forumet ndërkombëtare, për të denoncuar krimet serbe gjatë luftës së Kosovës dhe për të mbështetur pafajësinë e ish-drejtuesve të UÇK-së.
Deklarata e përbashkët
“Kuvendi i Republikës së Shqipërisë, në ushtrimin e kompetencave të veta kushtetuese dhe në përmbushje të rolit të vet si përfaqësues i vullnetit të popullit shqiptar, shpreh shqetësimin e thellë për kërkesën përfundimtare të Prokurorisë Speciale të Dhomave të Specializuara në Hagë ndaj drejtuesve të Ushtrisë Çlirimtare të Kosovës, Hashim Thaçi, Jakup Krasniqi, Kadri Veseli dhe Rexhep Selimi.
Kuvendi i Shqipërisë, duke mbajtur parasysh të vërtetën historike të luftës çlirimtare të shqiptarëve të Kosovës, rithekson se Ushtria Çlirimtare e Kosovës ishte një lëvizje legjitime çlirimtare që luftoi për të drejtat themelore të njeriut, për liri, dinjitet dhe vetëvendosje të popullit të Kosovës, në përputhje me parimet e së drejtës ndërkombëtare dhe Kartës së Kombeve të Bashkuara.
Kuvendi vëren me shqetësim se kërkesa e Prokurorisë Speciale rrezikon të krijojë një shtrembërim të rrezikshëm të historisë, duke barazuar luftën legjitime të një populli për mbijetesë dhe liri me krimet e regjimit serb të Millosheviçit, i cili kreu spastrim etnik dhe krime kundër njerëzimit ndaj popullit të Kosovës.
Për këtë, Kuvendi i Republikës së Shqipërisë deklaron:
- Mbështetjen e plotë dhe të pakushtëzuar për drejtuesit e Ushtrisë Çlirimtare të Kosovës, të cilët ishin dhe mbeten përfaqësues të aspiratave të drejta të popullit të Kosovës për liri dhe vetëvendosje. Lufta e tyre ishte luftë e drejtë, e mbështetur në parimet universale të të drejtave të njeriut.
- Kërkesën drejtuar Dhomave të Specializuara në Hagë, komunitetit ndërkombëtar dhe institucioneve të drejtësisë ndërkombëtare që të deklarojnë pafajësinë e Hashim Thaçit, Jakup Krasniqit, Kadri Veselit dhe Rexhep Selimit përmes një procesi të drejtë dhe të paanshëm, që respekton dhe nuk cënon dinjitetin e luftës çlirimtare të popullit të Kosovës, duke mos lejuar që instrumentet e drejtësisë të shndërrohen në mjete për rishkrimin e historisë apo për barazimin e viktimës me agresorin.
- Kujtimin ndaj bashkësisë ndërkombëtare se lufta e UÇK-së u zhvillua në kushtet kur regjimi i Millosheviçit po kryente spastrim etnik, krime sistematike kundër njerëzimit dhe akte genocidiale ndaj popullatës civile të Kosovës, dhe se ndërhyrja e NATO-s në vitin 1999 konfirmoi legjitimitetin e asaj lufte dhe natyrën kriminale të regjimit të Millosheviçit.
- Vlerësimin e lartë për dëshmitarët ndërkombëtarë të mbrojtjes, si Wesley Clark e James Rubin, të cilët konfirmuan të drejtën e popullit të Kosovës dhe udhëheqësve të tyre për liri.
- Solidaritetin e plotë me popullin e Kosovës dhe me familjet e drejtuesve të UÇK-së, duke ritheksuar se kombi shqiptar qëndron i bashkuar në mbrojtjen e të vërtetës historike dhe të dinjitetit të luftës për liri.
- Angazhimin për të ndërmarrë çdo hap të nevojshëm diplomatik dhe politik në forume ndërkombëtare për të siguruar që e vërteta historike mbi luftën çlirimtare të Kosovës të mos cënohet dhe që drejtësia të ushtrohet në mënyrë të drejtë.
Kuvendi i Republikës së Shqipërisë u bën thirrje institucioneve të shtetit Shqiptar, institucioneve të Republikës së Kosovës dhe diasporës shqiptare që të qëndrojnë të bashkuar në mbrojtjen e së vërtetës, dinjitetit dhe drejtësisë për popullin e Kosovës dhe për drejtuesit e luftës së tyre çlirimtare, Hashim Thaçi, Jakup Krasniqi, Kadri Veseli dhe Rexhep Selimi.
Kuvendi i Republikës së Shqipërisë u rekomandon qeverive të Republikës së Shqipërisë dhe të Republikës së Kosovës të bashkëpunojnë dhe koordinojnë për denoncimin ndërkombëtar të krimeve serbe.
Kjo deklaratë pasqyron vullnetin unanim të Kuvendit të Republikës së Shqipërisë dhe i transmetohet Dhomave të Specializuara në Hagë, Këshillit të Sigurimit të OKB-së, Parlamentit Evropian, Asambleve Parlamentare të NATO-s, OSBE-së dhe Këshillit të Evropës, si dhe të gjitha qeverive mike dhe partnere.”
