Kosova i jep fund ngërçit, votohet qeveria “Kurti 3”

Pas një viti të tërë bllokimi politik, Parlamenti i ri i Kosovës u konstituua sot. Në seancën e asamblesë së dhjetë, pas zgjedhjeve të 28 dhjetorit 2025, deputetët zgjodhën Albulena Haxhiun si kryetare të Kuvendit, një zgjedhje që hapi rrugë për formimin e një qeverie funksionale pas muajsh ngërçi.

Fitorja në zgjedhje i dha Lëvizjes Vetëvendosje të udhëhequr nga Albin Kurti 57 nga 120 vendet në Parlament, rezultat që e bën partinë dominuese në politikën kosovare, por pa shumicë absolute pa mbështetjen e partnerëve të komuniteteve pakicë.

Në fjalën e tij para nisjes së sesionit, Kurti njoftoi se prioriteti i tij është konstituimi i Kuvendit dhe formimi i Qeverisë së re, duke theksuar rëndësinë e institucioneve funksionale pas muajsh të humbur në gjyqe dhe bllokime.

Presidentja Vjosa Osmani mandatoi sot zyrtarisht Albin Kurtin për të formuar qeverinë e re.

Qeveria e re pritet të përqendrohet në miratimin e buxhetit të vitit 2026, rigjallërimin ekonomik dhe përmirësimin e marrëdhënieve me Bashkimin Evropian, ndërkohë që sfidat diplomatike me Serbinë mbeten në axhendë.

Zhvillimet e sotme vijnë pas një periudhe të gjatë ngecjes politike që zgjati pothuajse gjithë vitin 2025. Pas zgjedhjeve të 9 shkurtit 2025, Parlamenti i atëhershëm u përball me një grindje të pazakontë për zgjedhjen e kryetarit dhe verifikimin e mandateve të deputetëve, duke çuar në dhjetëra seanca të dështura dhe një bllokim institucional që paralizoi funksionimin normal të vendit.

Që në pranverë, kur vetë LVV dhe partitë opozitare u përplasën rreth emrit të kryesuesit të Kuvendit dhe procedurave të brendshme, procesi i konstituimit u shndërrua në një betejë politike që pengoi formimin e qeverisë dhe miratimin e buxhetit.

Në vjeshtën e kaluar u provua edhe një përpjekje për të formuar kabinetin e ri nën drejtimin e Kurtit, por propozimi nuk mori votat e nevojshme në Parlament, duke shtyrë vendin drejt zgjedhjeve të jashtëzakonshme që u mbajtën në fund të dhjetorit.

Kuvendi ka votuar qeverinw “Kurti 3” me 66 vota për, 49 vota kundër, asnjë abstenim.

Kabineti i “Kurti 3” do përbëhet nga:

Kryeministër – Albin Kurti

Zëvendëskryeministër i parë dhe Ministër i Punëve të Jashtme dhe Diasporës, Glauk Konjufca

Zëvendëskryeministre e dytë dhe Ministre e Drejtësisë, Donika Gërvalla

Zëvendëskryeministër i tretë për çështje të pakicave dhe bashkëpunim ekonomik, Fikrim Damka

Ministër i Financave dhe Ekonomisë, Hekuran Murati

Ministër për Familje dhe Mirëqenie Sociale, Andin Hoti

Ministër i Mbrojtjes, Ejup Maqedonci

Ministër i Punëve të Brendshme, Xhelal Sveçla

Ministër i Administratës Publike dhe Digjitalizimit, Lulëzon Jagxhiu

Ministër i Shëndetësisë, Arben Vitia