Një ditë pas vendimit të Gjykatës Kushtetuese që rrëzoi kërkesën e kryeministrit Edi Rama për Belinda Ballukun, deputeti i Partisë Demokratike, Endrit Këlliçi, akuzoi të dy politikanët si bashkëpërgjegjës për aferat korruptive që lidhen me tenderat dhe përdorimin e taksave të shqiptarëve.
Në një reagim të publikuar në rrjetet sociale, Këlliçi u shpreh se “kudo ku Belinda Balluku ka pasur rol vendimmarrës në tendera shtetërorë, fshihet realisht edhe dora e kryeministrit Edi Rama”. Ai shtoi se Balluku ka ndërtuar karrierën dhe ka marrë pushtet të madh falë zbatimit të besnikërisë ndaj urdhrave të shefit të qeverisë.
“Dita po vjen që Rama ta braktisë bashkëpunëtoren e tij më të afërt, por askush nuk mund të mashtrohet se ajo ka vepruar pa dijeninë e tij. Ata kanë qenë bashkë në çdo aferë dhe duhet të largohen bashkë si bashkëautorë”, tha Këlliçi.
Deputeti demokrat theksoi se sa kohë Edi Rama vazhdon të qëndrojë në krye të qeverisë, edhe Belinda Balluku mbetet pjesë e pushtetit. Në këtë kontekst, Këlliçi bëri thirrje për mobilizim qytetar, duke ftuar pjesëmarrjen në protestën e paralajmëruar më 10 shkurt, para asaj që ai e cilësoi si “zyra e krimit dhe korrupsionit”, me qëllim rritjen e presionit politik kundër qeverisë.
Reagimi i plotë i Këlliçit:
Kudo ku Belinda Balluku ka futur duart në tendera dhe taksat e shqiptarëve, fshihen në fakt gjymtyrët e paturpshme të Edi Ramës! Balluku bëri karrierë dhe mori shumë pushtet sepse realizonte me besnikëri dhe shpejtësi kërkesat e shefit. Dita po vjen që ai ta lëshojë bashkëpunëtoren më të afërt, por askush nuk mund të gënjehet më se ajo hëngri dardha pas krahëve të tij.
Ata kanë qenë bashkë në çdo aferë. Dhe të dy duhet të largohen si bashkëautorë. Sa kohë Rama qendron ende në zyrë, aty është dhe Belinda. Ndaj duhet më të vendosur, më me pasion e dashuri për Shqipërinë, të mblidhemi me 10 shkurt, para zyrës së krimit dhe korrupsionit.
Ky reagim pasqyron tensionet e vazhdueshme politike në vend dhe gatishmërinë e opozitës për të mobilizuar qytetarët kundër mazhorancës.
