Gjermania ka njoftuar se nuk do të pranojë më 640 afganë që ndodhen në Pakistan dhe që më herët ishin miratuar për t’u zhvendosur në territorin gjerman. Vendimi lidhet me pezullimin e dy programeve të krijuara nga qeveria e mëparshme për strehimin e afganëve të rrezikuar pas rikthimit të talibanëve në pushtet, përcjell Guardian.
Sipas Ministrisë së Brendshme, personat e prekur do të marrin njoftim zyrtar se “nuk ka më interes politik për pranimin e tyre”. Shumica e tyre janë ish-punonjës të ushtrisë ose institucioneve gjermane gjatë misionit ndërkombëtar në Afganistan.
Organizatat e të drejtave të njeriut kanë reaguar ndaj vendimit, duke e konsideruar atë në kundërshtim me vendime të mëparshme gjyqësore. Karl Kopp, përfaqësues i Pro Asyl, deklaroi se “qeveria e mëparshme premtoi t’i pranonte këta persona për arsye të angazhimit të tyre në mbështetje të të drejtave të njeriut në Afganistan”.
Qeveria e mëparshme gjermane kishte evakuuar rreth 4,000 punonjës lokalë afganë dhe rreth 15,000 familjarë të tyre deri në prill 2025. Që prej ardhjes në pushtet të kancelarit Friedrich Merz, qeveria aktuale ka reduktuar lëvizjet e reja, duke u ofruar kompensim personave që heqin dorë nga e drejta e zhvendosjes. Sipas Ministrisë së Brendshme, vetëm 62 persona kanë pranuar ofertën.
Organizatat joqeveritare raportojnë se deri në 1,800 afganë të miratuar për zhvendosje vazhdojnë të presin në Pakistan. Ministri i Brendshëm Alexander Dobrindt ka deklaruar se vetëm personat me një “premtim ligjërisht të detyrueshëm” do të mbeten të pranueshëm për procedurat e evakuimit, duke kufizuar numrin e të autorizuarve.
Një ish-instruktor policie afgan, i cituar nga Frankfurter Rundschau, u shpreh se vendimi i ka ndryshuar situatën brenda një dite: “Në një çast, të gjitha shpresat dhe pritjet e mia për një jetë normale u rrëzuan”.
Më shumë se 250 organizata ndërkombëtare dhe vendore kanë publikuar një letër të përbashkët duke i kërkuar qeverisë gjermane të përmbushë angazhimet ndaj afganëve të bllokuar, përfshirë Amnesty International dhe Human Rights Watch. Ato kërkojnë evakuimin e rreth 1,800 personave para afatit të vendosur nga qeveria pakistaneze për largimin e tyre nga vendi.
Ndërkohë, Gjermania ka vijuar me deportimet drejt Afganistanit, pas vendimit të vitit të kaluar për të rifilluar kthimet e personave me precedent penal, ndërsa Ministria e Jashtme raporton se situata e të drejtave të njeriut në vend mbetet problematike.
