Një grup prej dhjetëra zyrtarësh nga e gjithë qeveria federale, përfshirë oficerë të inteligjencës amerikane, ka ndihmuar në drejtimin e përpjekjes së presidentit Donald Trump për ndëshkim ndaj armiqve të tij të perceptuar, sipas dokumenteve qeveritare dhe një burimi të njohur me nismën.
Grupi i Punës Ndëragjencive për “Armatizimin” (Interagency Weaponization Working Group), i cili është mbledhur që nga të paktën muaji maj, ka përfshirë zyrtarë nga Shtëpia e Bardhë, Zyra e Drejtorit të Inteligjencës Kombëtare (ODNI), Agjencia Qendrore e Inteligjencës (CIA), Departamentet e Drejtësisë dhe të Mbrojtjes, Byroja Federale e Hetimit (FBI), Departamenti i Sigurisë Kombëtare, Shërbimi i të Ardhurave të Brendshme (IRS) dhe Komisioni Federal i Komunikimeve (FCC), ndër të tjera agjenci, sipas dy dokumenteve.
Trump nxori një urdhër ekzekutiv në ditën e inaugurimit të tij në janar, duke i kërkuar Prokurorit të Përgjithshëm që të punonte me agjencitë e tjera federale “për të identifikuar dhe ndërmarrë veprimet e duhura për të korrigjuar sjelljet e gabuara të qeverisë federale që lidhen me armatizimin e zbatimit të ligjit dhe të Komunitetit të Inteligjencës.”
Prokurorja e Përgjithshme Pam Bondi dhe Drejtorja e Inteligjencës Kombëtare Tulsi Gabbard njoftuan më herët gjatë këtij viti ngritjen e grupeve brenda agjencive të tyre për të “zbuluar” ata që, sipas tyre, kanë keqpërdorur pushtetin e qeverisë kundër Trump.
Disa zyrtarë amerikanë e konfirmuan ekzistencën e Grupit Ndëragjencive për Armatizimin për Reuters, duke thënë se qëllimi i tij është të zbatojë urdhrin ekzekutiv të Trump.
Një zyrtar i Shtëpisë së Bardhë, që foli në kushte anonimiteti, tha: “Asgjë nga kjo raportim nuk është e re.”
Zëdhënësja e ODNI-së, Olivia Coleman, tha: “Amerikanët meritojnë një qeveri të përkushtuar për çarmatizimin, depolitizimin dhe sigurimin që pushteti të mos kthehet më kurrë kundër njerëzve për të cilët ekziston.”
Ekzistenca e këtij grupi ndëragjencish tregon se përpjekjet e administratës për të përdorur pushtetin e qeverisë kundër armiqve të perceptuar të Trump janë më të gjera dhe më sistematike se sa ishte raportuar më parë.
Trump dhe aleatët e tij përdorin termin “armatizim” për t’iu referuar pretendimeve të tyre të pabazuara se zyrtarët e administratave të mëparshme abuzuan me pushtetin federal për ta goditur gjatë dy procedurave të fajësimit, ndjekjeve penale dhe hetimit për ndërhyrjen ruse në zgjedhjet e vitit 2016.
Burimi tha se misioni i grupit ndëragjencish është “në thelb të shkojë pas ‘Shtetit të Thellë’.”
Ky është termi që Trump dhe mbështetësit e tij e përdorin për të përshkruar armiqtë e perceptuar nga administratat Obama dhe Biden dhe nga mandati i tij i parë.
Reuters nuk mundi të përcaktonte në çfarë mase grupi ndëragjencish ka vënë në zbatim planet e tij, as të konfirmonte përfshirjen e drejtpërdrejtë të Trump në grup.
Biden, Comey dhe të tjerë të përmendur
Burimi tha se ndër ata që janë diskutuar nga grupi ndëragjencish janë ish-drejtori i FBI-së James Comey, Anthony Fauci, këshilltar mjekësor i Trump për pandeminë e COVID-19, dhe ish-komandantë të lartë ushtarakë që zbatuan urdhrin për vaksinim të detyrueshëm të anëtarëve të shërbimit ushtarak. Diskutimet kanë përfshirë gjithashtu djalin e ish-presidentit Joe Biden, Hunter Biden, tha burimi.
Një zyrtar i lartë i ODNI-së hodhi poshtë këtë version, duke thënë se nuk ka “asnjë shënjestrim të ndonjë personi të veçantë për hakmarrje.”
“IWWG po shqyrton vetëm faktet dhe provat e disponueshme që mund të tregojnë për veprime, raporte, agjenci ose individë që kanë armatosur në mënyrë të paligjshme qeverinë për të kryer sulme politike,” tha zyrtari.
Avokatët e Comey dhe Hunter Biden nuk iu përgjigjën kërkesave për koment, dhe nuk kishte përgjigje as nga Fauci.
Reuters shqyrtoi më shumë se 20 dokumente qeveritare dhe identifikoi 39 persona të përfshirë në grupin ndëragjencish. Pesë nga dokumentet kishin lidhje me grupin ndëragjencish, pesë të tjera me Grupin e Punës për Armatizimin që Bondi njoftoi në shkurt, dhe nëntë të tjera me një nën-grup më të vogël që fokusohet në sulmin e 6 janarit 2021 në Kapitol.
Një lojtar i rëndësishëm në grupin ndëragjencish, sipas burimit, është avokati i Departamentit të Drejtësisë Ed Martin, i cili dështoi në maj të merrte miratimin e Senatit si Prokuror Federal për Uashingtonin, pas shqetësimeve për mbështetjen e tij ndaj protestuesve të 6 janarit.
Martin, i cili mbikëqyr edhe grupin e armatizimit të DOJ, është tani Avokat i Faljeve në Departamentin e Drejtësisë.
Martin nuk iu përgjigj kërkesave për koment.
Ndër personat e tjerë të përfshirë në ose bashkëpunues me grupin janë kundërshtarë të vaksinës kundër COVID-19 dhe përkrahës të pretendimeve të rreme të Trump se zgjedhjet e 2020 u vodhën prej tij, sipas një analize të llogarive të tyre në rrjete sociale dhe deklaratave publike.
Zëdhënësi i Departamentit të Drejtësisë pranoi se Bondi dhe Gabbard janë urdhëruar nga Trump të kryejnë një rishikim të veprimeve të “armatizimit” nga administratat e mëparshme, por nuk komentoi drejtpërdrejt mbi aktivitetet e grupit ndëragjencish.
Hetimi për Rusinë dhe çështja e 6 janarit
Burimi tha se një figurë kryesore në grup është Paul McNamara, zyrtar i ODNI-së, ish-oficer i Marinës dhe ndihmës i Gabbard. Ai thuhet se mbikëqyr Director’s Initiatives Group (DIG) të Gabbard, i cili është vënë në qendër të vëmendjes së Kongresit.
Dy burime të tjera thanë se McNamara mbikëqyr këtë grup, i cili është nën hetim nga Kongresi. Ligjvënësit republikanë dhe demokratë kanë miratuar një dispozitë në projektbuxhetin e mbrojtjes që kërkon nga Gabbard të zbulojë emrat, rolet dhe financimet e anëtarëve të DIG-ut, si dhe mënyrën e marrjes së lejeve të sigurisë.
Burimi tha se grupi është informuar se ODNI kishte filluar të përdorte “mjete teknike” për të kërkuar në një rrjet të paklasifikuar komunikimesh prova të “shtetit të thellë” dhe se synonte ta zgjeronte kërkimin në rrjete të klasifikuara si SIPRnet dhe JWICS.
Zyrtari i ODNI-së e hodhi poshtë këtë pretendim si të pasaktë dhe tha se “nuk është kështu si funksionojnë sistemet.”
Një “shtyllë kryesore”, tha burimi, ishte spastrimi i zyrtarëve të përfshirë në hetimin për ndërhyrjen e Rusisë në zgjedhjet e vitit 2016 dhe në vlerësimin e inteligjencës së vitit 2017 që përfundoi se Moska kishte tentuar të ndikonte garën në favor të Trump.
Gabbard tha në korrik se DIG kishte gjetur dokumente që tregonin se ish-presidenti Barack Obama kishte urdhëruar agjencitë e inteligjencës të fabrikonin raportin e vitit 2017 – pretendime që një zëdhënës i Obamës i quajti “të çuditshme.”
Konkluzionet e raportit të vitit 2017 u konfirmuan nga një raport dypartiak i Komitetit të Inteligjencës së Senatit në gusht 2020 dhe nga një rishikim i porositur më herët këtë vit nga Drejtori i CIA-s, John Ratcliffe.
Një tjetër fokus për grupin ndëragjencish ka qenë hakmarrja për ndjekjet penale të sulmuesve të 6 janarit, tha burimi.
Pjesëmarrës të lidhur ngushtë me Trump
Reuters zbulon se shumë nga personat e përfshirë në grup kanë qenë përkrahës të hapur të Trump. Njëri prej tyre është Andrew “Mac” Warner, ish-sekretar i shtetit në Virxhinia Perëndimore dhe aktualisht avokat në Divizionin e të Drejtave Civile në Departamentin e Drejtësisë, i cili ka pretenduar publikisht se “CIA i vodhi zgjedhjet e vitit 2020 Trump-it.”
Në dokumente përmenden gjithashtu dy oficerë të CIA-s, por Reuters nuk mundi të përcaktonte rolin e tyre në grup.
CIA është e ndaluar me ligj të ndërmarrë operacione brenda SHBA-së, përveç në rrethana shumë të veçanta.
As FBI, IRS, FCC dhe Departamenti i Mbrojtjes nuk iu përgjigjën kërkesave për koment. Një zëdhënës i Departamentit të Sigurisë Kombëtare tha se agjencia “po punon me departamente të tjera për të zhbërë dëmet e shkaktuara nga administrata e mëparshme.”
VINI RE: Ky material është pronësi intelektuale e Reuters
