BlackRock ka nënshkruar një marrëveshje prej 11 miliardë dollarësh për impiantet e përpunimit të gazit natyror në Arabinë Saudite, si pjesë e planeve të kompanisë shtetërore të energjisë Saudi Aramco për të tërhequr kapital të huaj në mbretëri.
Saudi Aramco nënshkroi të enjten marrëveshjen 20-vjeçare për të dhënë me qira impiantet që përpunojnë gaz natyror në pellgun e Jafurah një grupi investimi të udhëhequr nga Global Infrastructure Partners, firma private e investimeve që BlackRock e bleu vitin e kaluar.
Si pjesë e transaksionit, konsorciumi do t’ia japë me qira impiantet Aramco-s. Një degë e re e Aramco-s, e njohur si Jafurah Midstream Gas Company, do mbajë asetet, me grupin shtetëror të naftës që zotëron 51 përqind të divizionit. GIP dhe bashkëinvestitorët e saj do zotërojnë 49 përqind të mbetur.
Marrëveshja është sinjali më i fundit se Arabia Saudite po fiton njëfarë mbështetjeje në përpjekjet e saj për të tërhequr kapital të huaj për të mbështetur ambiciet e saj ekonomike.
Arabia Saudite raportoi 6.4 miliardë dollarë hyrje të investimeve të huaja direkte në tremujorin e parë të këtij viti, një rritje prej 24% nga viti 2024, sipas të dhënave zyrtare paraprake.
Megjithatë, mbretëria ka luftuar për të tërhequr investime të huaja jashtë sektorit të energjisë, ndërsa kërkon të diversifikojë ekonominë larg varësisë nga të ardhurat nga nafta. Investimet e huaja direkte hyrëse në përgjithësi ranë me 19% nga viti në vit në 20.7 miliardë dollarë vitin e kaluar, më e ulëta që nga viti 2020, shkruan FT.
Drejtori ekzekutiv i Aramco, Amin Nasser, tha: “Ky investim i huaj direkt në mbretëri gjithashtu thekson tërheqjen e strategjisë afatgjatë të Aramco për komunitetin ndërkombëtar të investimeve.”
Në gusht, Nasser tha se kompania ishte në rrugën e duhur për të filluar prodhimin në pellgun Jafurah më vonë këtë vit. Projekti pritet të sigurojë gaz natyror për nevojat energjetike në Arabinë Saudite, duke i lejuar mbretërisë të shesë naftë bruto jashtë vendit që përndryshe do të digjej në vend për të gjeneruar energji.
Pellgu Jafurah mban një nga rezervat më të mëdha të gazit natyror në Arabinë Saudite, që vlerësohet të mbajë rreth 229 trilion metër kub standarde gaz të papërpunuar, sipas Aramco.
Investimi prej 11 miliardë dollarësh pritej të ndryshohej me kalimin e kohës dhe do tërhiqej nga fondet e investimeve të tregut të mesëm të GIP, të cilat drejtohen nga Mark Florian, tha një person i informuar për këtë çështje.
Marrëveshja është e fundit midis BlackRock dhe Arabisë Saudite. Në fund të vitit 2021, kompania amerikane udhëhoqi një konsorcium që nënshkroi një marrëveshje qiraje dhe rimarrjeje me qira prej 15.5 miliardë dollarësh që përfshinte rrjetin e tubacioneve të gazit të Aramco. Nasser iu bashkua bordit të BlackRock në korrik 2023.
