Senati miratoi një plan të miratuar nga Shtëpia e Bardhë për të anuluar 9 miliardë dollarë fonde federale për programet e ndihmës së huaj dhe median publike, pasi Dhoma e udhëhequr nga Republikanët bllokoi përpjekjet për të zvogëluar paketën në një seancë maratonë votimi gjatë natës.
Masa u miratua 51-48 në orën 2:30 të mëngjesit të enjten, me senatorët republikanë Susan Collins dhe Lisa Murkoëski që iu bashkuan demokratëve në opozitë. Projektligji tani i drejtohet Dhomës së Përfaqësuesve, e cila duhet ta miratojë atë deri të premten ose dega ekzekutive duhet të lirojë fondet, shkruan WSJ.
Senatorët republikanë mposhtën një sërë rishikimesh të kërkuara nga demokratët dhe disa republikanë për të rivendosur fondet në paketën që synon të kthejë në ligj shkurtimet e identifikuara nga përpjekja e presidentit Trump për Departamentin e Efikasitetit të Qeverisë (DOGE).
Projektligji në fakt u kërkon ligjvënësve të tërheqin fondet që kanë ndarë më parë, përfshirë 7.9 miliardë dollarë nga programet e ndihmës së huaj. Plani gjithashtu do anulojë 1.1 miliardë dollarë nga Korporata për Transmetimin Publik – organizata që mbikëqyr financimin qeveritar për Radion Publike Kombëtare dhe Shërbimin e Transmetimit Publik – duke e ndërprerë financimin e saj për dy vitet e ardhshme fiskale.
Republikanët kanë kritikuar prej kohësh NPR dhe PBS për atë që e shohin si një paragjykim liberal dhe kanë vënë në pikëpyetje financimin e tyre me paratë e taksapaguesve. Trump e quajti CPB një “monstruozitet” në një postim në mediat sociale javën e kaluar dhe kërcënoi senatorët republikanë se do tërhiqte mbështetjen e tij nga kushdo që kundërshtonte shkurtimet.
