Një çift i moshuar ka humbur jetën pas një sulmi me raketë iraniane në zonën qendrore të Izraelit, pranë Tel Avivit.
Sipas raportimit të Ynetnews, një raketë me municion thërrmues goditi një ndërtesë në Ramat Gan, duke shkaktuar dëme të mëdha.
Viktimat, një burrë dhe një grua rreth të 70-ave, ndodheshin në apartamentin e tyre në momentin e shpërthimit dhe nuk arritën të futeshin në dhomën e sigurisë në kohë. Ata u gjetën vetëm pak metra larg hapësirës së mbrojtur.
Shpërthimi ka shkaktuar gjithashtu dëme në zona të tjera përreth, përfshirë stacionin Savidor në Tel Aviv, ndërsa janë raportuar edhe zjarre dhe të paktën disa persona të plagosur lehtë.
Dëshmitarët treguan se pas alarmit ajror dëgjuan një shpërthim të fuqishëm, i ndjekur nga tym i dendur dhe erë djegieje në zonë.
Sulmi vjen në kuadër të përshkallëzimit të konfliktit mes Izraelit dhe Iranit, ku goditjet me raketa dhe dronë kanë rritur ndjeshëm tensionet në rajon.
