Kryeministri izraelit, Benjamin Netanyahu, publikoi të dielën një video ku shfaqet duke marrë një kafe dhe duke biseduar me asistentin e tij, pas thashethemeve të përhapura nga media shtetërore iraniane dhe në rrjetet sociale në Iran se ai kishte vdekur ose ishte plagosur.
Në videon e xhiruar në një kafene në periferi të Jeruzalemit dhe të postuar në llogarinë e Netanyahut në Telegram, asistenti e pyet atë rreth këtyre thashethemeve.
Netanyahu përgjigjet me një lojë fjalësh me fjalën “i vdekur” — e cila në zhargonin hebraik mund të përdoret edhe për të përshkruar dikë që “vdes pas” ose “është i çmendur pas” diçkaje — ndërkohë që merr filxhanin e kafesë.
“Vdes për kafenë. E dini çfarë? Unë vdes për popullin tim,” i thotë Netanyahu asistentit.
Reuters verifikoi lokacionin e videos përmes pamjeve arkivore të kafenesë, të cilat përputheshin me ambientin e brendshëm që shihej në video. Data u verifikua nga video dhe foto të shumta të vizitës së Netanyahut, të postuara nga vetë kafeneja të dielën.
Që kur SHBA dhe Izraeli nisën sulmet ndaj Iranit më 28 shkurt, Netanyahu ka vizituar të paktën dy qytete të goditura nga raketa iraniane, një spital, portin dhe baza ushtarake, por qasja e medias ka qenë e pakët ose zero, dhe videot janë shpërndarë nga zyra e tij.
Netanyahu, i cili rrallëherë jep intervista për shtypin izraelit ose mban konferenca për gazetarët, thirri konferencën e tij të parë që nga fillimi i luftës përmes një lidhjeje video të enjten — një format i ngjashëm me atë që përdori në qershor gjatë luftës 12-ditore të Izraelit me Iranin.
Kufizimet emergjente të sigurisë në Izrael që nga fillimi i luftës ndalojnë grumbullimet publike dhe i kanë mbajtur shumicën e njerëzve në shtëpi ose pranë dhomave të sigurta, ndërkohë që shkollat mbeten të mbyllura në pjesën më të madhe të vendit, shkruan Reuters.
