Ministria e Shëndetësisë e Libanit njoftoi të dielën se 14 persona, përfshirë katër fëmijë, u vranë dhe tetë të tjerë u plagosën në tri sulme ajrore të kryera nga Izraeli në jug të Libanit.
“Në sulmin e kryer në lagjen Rahibat në qytetin e Nabatieh, në jug të Libanit, u vranë shtatë persona, përfshirë katër fëmijë,” tha ministria në një deklaratë.
Deklarata dha gjithashtu informacione rreth sulmeve që shënjestruan zonën Haret Saida në qytetin e Sidonit (Saida) dhe zonën Katrani në qytetin e Jezzine, në jug të Libanit.
Sipas ministrisë, shtatë persona të tjerë u vranë në dy sulmet izraelite në Haret Saida dhe Katrani. Katër persona vdiqën në Haret Saida dhe tre në Katrani, ndërsa tetë persona u plagosën gjatë sulmeve.
Gjithashtu, mediat lokale libaneze raportuan se herët në mëngjes, ushtria izraelite shënjestroi një apartament në zonën Shurahbil të Sidonit. Deri më tani nuk është dhënë informacion i detajuar rreth pasojave të atij goditja.
Ministria e Shëndetësisë e Libanit kishte njoftuar më parë se 826 persona janë vrarë që nga 2 marsi në sulmet e vazhdueshme izraelite, duke përfshirë 106 fëmijë dhe 65 gra, shkruan AA.
