Dëmtimi dramatik i segmentit të rrugës kombëtare Librazhd–Prrenjas, në zonën e Arrave të Dragostunjës, po merr përmasa me pasoja të rënda infrastrukturore dhe socio-ekonomike, duke paralizuar pjesërisht jo vetëm qarkullimin, por edhe jetën e përditshme të një pjese të konsiderueshme të vendit.
Kjo arterie strategjike, që lidh kryeqytetin me juglindjen, tashmë është kthyer në një pikë kritike kombëtare. Prej disa ditësh, Autoriteti Rrugor Shqiptar dhe strukturat shtetërore përkatëse janë në alarm për të gjetur një zgjidhje emergjente për zhbllokimin e situatës, si dhe një alternativë afatgjatë e të qëndrueshme.
Burime nga grupet teknike konfirmojnë se diskutimet kanë vijuar nga pasditja e djeshme deri në mesnatë, ndërsa edhe sot paradite pritet një tjetër tryezë intensive me inxhinierë të projektimit rrugor. Në fokus është rishikimi i plotë i qasjes teknike ndaj segmentit problematik.
Sipas burimeve, po shqyrtohet seriozisht devijimi i projektit ekzistues. Madje, nuk përjashtohet mundësia e anulimit të përhershëm të punimeve në segmentin aktual, pasi zona ka shfaqur gjatë këtij muaji paqëndrueshmëri të theksuar gjeologjike, duke e bërë investimin me risk të lartë edhe në të ardhmen.
Në ditët në vijim pritet të kryhet një vlerësim i plotë tektonik dhe gjeodinamik i zonës ku po realizoheshin punimet nga kompania ANK sh.p.k. Ekspertiza do të përcaktojë nëse territori përbën rrezik të vazhdueshëm për infrastrukturë me rëndësi kombëtare.
Një nga opsionet e diskutuara është rikthimi te projekti alternativ, ku një pjesë e rrugës do të kalojë mbi ose përgjatë rrjedhës së Lumi Shkumbin, duke shmangur masivin problematik që ka shfaqur lëvizje të vazhdueshme të tokës.
Bllokimi i këtij aksi ka krijuar efekte zinxhir në transportin e mallrave, lëvizjen e qytetarëve, ofrimin e shërbimeve publike dhe ekonominë rajonale. Situata po konsiderohet si një emergjencë infrastrukturore kombëtare.
Vendimmarrja që pritet në ditët në vijim do të jetë përcaktuese jo vetëm për fatin e këtij segmenti, por edhe për modelin e ndërhyrjes në zona me risk të lartë gjeologjik në të gjithë vendin. Shqipëria përballet me një nga sfidat më serioze infrastrukturore të viteve të fundit, ndërsa zgjidhja kërkon një vendim profesional, të guximshëm dhe afatgjatë.
