Irani ka bërë të ditur se është i përgatitur të bëjë lëshime në programin e tij bërthamor në bisedimet me SHBA-në, në këmbim të heqjes së sanksioneve dhe njohjes së të drejtës së tij për të pasuruar uranium, ndërsa kërkon të shmangë një sulm amerikan.
Të dyja palët mbeten të ndara ashpër — madje edhe për gamën dhe sekuencën e lehtësimit nga sanksionet gjymtuese të SHBA-së — pas dy raundeve të bisedimeve, tha për Reuters një zyrtar i lartë iranian.
Megjithatë, Reuters raporton për herë të parë se Irani po ofron lëshime të reja që kur bisedimet e tyre përfunduan javën e kaluar, kur palët u dukën larg njëra-tjetrës dhe po i afroheshin konfliktit ushtarak. Analistët thonë se kjo lëvizje sugjeron që Teherani po përpiqet të mbajë gjallë diplomacinë dhe të parandalojë një sulm madhor nga SHBA.
Zyrtari tha se Teherani do konsideronte seriozisht dërgimin e gjysmës së uraniumit të tij më të pasuruar jashtë vendit, hollimin e pjesës tjetër dhe marrjen pjesë në krijimin e një konsorciumi rajonal pasurimi – një ide e ngritur periodikisht në vitet e diplomacisë lidhur me Iranin.
Irani do e bënte këtë në këmbim të njohjes nga SHBA të së drejtës së Iranit për “pasurim bërthamor paqësor” sipas një marrëveshjeje që do të përfshinte gjithashtu heqjen e sanksioneve ekonomike, tha zyrtari.
Përveç kësaj, Irani ka ofruar hapësira që kompanitë amerikane të marrin pjesë si kontraktorë në industritë e mëdha të naftës dhe gazit të Iranit, tha zyrtari, në negociatat për të zgjidhur dekada mosmarrëveshjesh mbi aktivitetet bërthamore të Teheranit.
“Brenda paketës ekonomike që po negocohet, Shteteve të Bashkuara u janë ofruar gjithashtu mundësi për investime serioze dhe interesa ekonomike të prekshme në industrinë e naftës të Iranit,” tha zyrtari.
Shtëpia e Bardhë nuk iu përgjigj menjëherë pyetjeve mbi këtë çështje.
Uashingtoni e sheh pasurimin brenda Iranit si një rrugë potenciale drejt armëve bërthamore. Irani mohon kërkimin e armëve bërthamore dhe dëshiron që t’i njihet e drejta e tij për të pasuruar uranium.
Irani dhe Shtetet e Bashkuara rinisën negociatat në fillim të këtij muaji ndërsa SHBA po rrit kapacitetet e saj ushtarake në Lindjen e Mesme. Irani ka kërcënuar se do të godasë bazat amerikane në rajon nëse sulmohet.
Zyrtari iranian tha se diskutimet më të fundit nënvizuan hendekun midis dy palëve, por theksoi se “mundësia e arritjes së një marrëveshjeje të përkohshme ekziston” ndërsa negociatat vazhdojnë, shkruan Reuters.
