Qindra veteranë danezë që shërbyen pranë trupave amerikane organizuan një protestë të heshtur në Kopenhagë, për të shprehur kundërshtimin ndaj komenteve të presidentit Donald Trump, i cili minimizoi rolin e forcave të NATO-s jashtë SHBA-së në Afganistan, përcjell Euronews.
Veteranët marshuan nga një memorial për ushtarët e rënë deri te ambasada e SHBA-së, duke mbajtur flamuj danezë dhe pankarta me mbishkrimin “Pa fjalë”. Pasi mbërritën te ambasada, ata vendosën flamuj danezë të qëndisur me emrat e ushtarëve të rënë në Afganistan dhe Irak pranë hyrjes së ambasadës.
Të pranishmit brohoritën ndërsa veteranët dhe familjet e tyre marshuan nëpër rrugët e qytetit, duke nderuar sakrificën dhe kontributin e trupave daneze. Organizatorët thanë se protesta u nxit edhe nga komentet e Trump mbi Groenlandën dhe heqjen e flamujve danezë që ishin vendosur më parë jashtë ambasadës.
Forcat daneze kanë pësuar humbje të mëdha jashtë vendit, me 44 ushtarë të rënë në Afganistan—numri më i lartë për frymë ndër partnerët e koalicionit—dhe tetë të tjerë në Irak.
