Ministri i Drejtësisë i Francës, Gérald Darmanin, ka hedhur idenë e një pezullimi pothuajse total të emigracionit të ligjshëm për një periudhë deri në tre vjet, në një lëvizje politike që vjen ndërsa ai përgatitet të sfidojë partinë e ekstremit të djathtë Tubimi Kombëtar (Rassemblement National) në zgjedhjet presidenciale të vitit të ardhshëm.
Në një intervistë për transmetuesin francez LCI këtë javë, Darmanin deklaroi se mbështet “një ndalesë të imigracionit për dy ose tre vjet, e shoqëruar me rritje pagash, në mënyrë që vendet e punës që sot kryhen nga të huaj me kosto shumë të ulët, t’u kalojnë qytetarëve francezë”.
Pas përfundimit të këtij moratoriumi, ai sugjeroi vendosjen e një sistemi kuotash, si edhe organizimin e një referendumi kombëtar për të përcaktuar numrin e imigrantëve që Franca do të pranojë në të ardhmen.
Sipas të dhënave të Ministrisë së Brendshme, në Francë jetojnë rreth 4.5 milionë imigrantë të ligjshëm, që përbëjnë mbi 8% të popullsisë adulte. Përveç tyre, vlerësohet se rreth 700,000 migrantë të tjerë qëndrojnë në vend pa dokumente të rregullta. Një sondazh i cituar nga The Times tregon se 80% e votuesve francezë mbështesin politika më të ashpra mbi imigracionin.
Aktualisht, kreu i Tubimit Kombëtar, Jordan Bardella, kryeson sondazhet për zgjedhjet presidenciale të vitit të ardhshëm. Ish-kryeministri Gabriel Attal, nga partia Renaissance e Presidentit Emmanuel Macron, renditet i treti, me një diferencë të konsiderueshme. Bardella e ka përshkruar imigracionin si një kërcënim “për vetë ekzistencën e Francës” dhe ka premtuar se veprimi i tij i parë si president do të jetë thirrja e një referendumi mbi këtë çështje.
Darmanin, anëtar i partisë së Macron-it, i tha LCI-së se e konsideron veten “material për president” dhe u bëri thirrje strukturave të partisë që të organizojnë zgjedhje paraprake, për të përzgjedhur kandidatin që do të përballet me Tubimin Kombëtar.
Në vitin 2023, Darmanin hartoi një projektligj gjithëpërfshirës për reformën e imigracionit, i cili parashikonte masa të forta, përfshirë:
vendosjen e kuotave të rrepta;
përfundimin e bashkimit familjar;
heqjen e së drejtës së nënshtetësisë përmes lindjes;
kufizimin e aksesit në përfitime sociale për shumicën e emigrantëve.
Megjithatë, këto dispozita u rrëzuan nga Këshilli Kushtetues. Versioni përfundimtar, i nënshkruar më vonë nga Presidenti Macron, lejoi imigrantët pa dokumente në disa sektorë specifikë të merrnin leje pune, ndërsa njëkohësisht thjeshtoi procedurat e dëbimit për të tjerët.
Pavarësisht përpjekjeve për të fituar mbështetjen e elektoratit të djathtë, Darmanin theksoi se nuk planifikon të paraqesë një projektligj të ri për emigracionin, shkruan Rt.
