Hamasi po kërkon që forca e tij policore të ketë një rol në Gazë përpara çdo diskutimi mbi çarmatimin, bëjnë të ditur burime të njohura me çështjen.
Sipas tyre, grupi synon të integrojë rreth 10,000 oficerë policie të tij në një administratë të re palestineze për Gazën, e cila do të mbështetej nga Shtetet e Bashkuara. Kjo kërkesë pritet të përballet me kundërshtim nga Izraeli, në një kohë kur vetë Hamasi po debaton nëse duhet apo jo të dorëzojë armët.
Grupi islamist Hamas ruan kontrollin mbi pak më pak se gjysmën e Gazës pas marrëveshjes së armëpushimit të arritur në tetor, e ndërmjetësuar nga presidenti amerikan Donald Trump. Marrëveshja parashikon që tërheqjet e mëtejshme të trupave izraelite të kushtëzohen me dorëzimin e armëve nga ana e Hamasit.
Plani me 20 pika për përfundimin e luftës, i cili ndodhet tashmë në fazën e dytë, parashikon që administrimi i Gazës t’i kalojë Komitetit Kombëtar për Administrimin e Gazës (NCAG). Ky organ teknokratik palestinez, nën mbikëqyrjen e SHBA-së, synon të përjashtojë Hamasin nga qeverisja.
HAMASI I BËN THIRRJE STAFIT TË BASHKËPUNOJË ME KOMISIONIN
Në një letër drejtuar punonjësve të dielën, të siguruar nga Reuters, qeveria e Gazës e drejtuar nga Hamasi u kërkoi mbi 40,000 nëpunësve civilë dhe pjesëtarëve të forcave të sigurisë që të bashkëpunojnë me NCAG-në, duke i siguruar njëkohësisht se po punohej për integrimin e tyre në administratën e re.
Sipas katër burimeve të njohura me procesin, kjo do të përfshinte edhe forcën policore të Hamasit prej rreth 10,000 personash, një kërkesë që nuk ishte raportuar më parë. Shumë prej këtyre oficerëve kanë patrulluar në Gazë ndërsa Hamasi po ripohon kontrollin në zonat që vazhdojnë të jenë nën autoritetin e tij.
Nuk ishte e qartë nëse Izraeli, i cili ka refuzuar në mënyrë të prerë çdo rol të Hamasit në të ardhmen e Gazës, do të pranonte përfshirjen e punonjësve civilë dhe të sigurisë në strukturat e NCAG-së. Zyra e kryeministrit izraelit Benjamin Netanyahu nuk iu përgjigj kërkesave për koment.
MBETEN MOSMARRËVESHJE TË MËDHA
Planet e Hamasit lidhur me policinë dhe administratën civile nxjerrin në pah ndarje të thella mes Hamasit dhe Izraelit, i cili mbështetet nga SHBA-ja, ndërsa Trump po përpiqet të çojë përpara nismat e tij.
Javën e kaluar, Trump organizoi një ceremoni nënshkrimi për krijimin e “Bordit të Paqes” (Board of Peace), i cili do të shërbejë si një administratë tranzitore për të përcaktuar kuadrin dhe për të koordinuar financimin e rindërtimit të Gazës. Ky kuadër përfshin një dispozitë që ndalon përfshirjen e “organizatave të huaja terroriste” në qeverisje.
Zëdhënësi i Hamasit, Hazem Qassem, i tha Reuters se grupi ishte i gatshëm t’ia dorëzonte menjëherë administrimin NCAG-së me 15 anëtarë dhe kryetarit të saj, Ali Shaath.
“Ne kemi besim të plotë se ai do të veprojë duke u mbështetur në personel të kualifikuar dhe duke mos cenuar të drejtat e askujt që ka shërbyer gjatë periudhës së kaluar,” deklaroi Qassem, duke iu referuar përfshirjes së rreth 40,000 punonjësve.
Katër burime thanë se Hamasi është i hapur ndaj ristrukturimit të ministrive nga NCAG-ja dhe dërgimit të disa punonjësve në pension, por paralajmëruan se shkarkimet masive do të rrezikonin krijimin e kaosit.
Një zyrtar i Hamasit tha se grupi dhe kryetari i NCAG-së, Shaath, ende nuk janë takuar personalisht për të diskutuar çështjet e qeverisjes. Zyra e Shaath nuk iu përgjigj kërkesës për koment.
Një tjetër pikë e ndjeshme lidhej me faktin nëse Sami Nasman, ish-gjenerali i Autoritetit Palestinez i caktuar për të mbikëqyrur sigurinë nën NCAG-në, do të ishte në gjendje të ushtronte funksionet e tij në mënyrë efektive, sipas një zyrtari palestinez.
Nasman, i lindur në Gazë, u zhvendos në Bregun Perëndimor të pushtuar pasi Hamasi dëboi forcat e Autoritetit Palestinez nga enklava në vitin 2007, pas një konflikti të shkurtër civil. Më vonë, një gjykatë e Hamasit në Gazë e dënoi atë në mungesë, duke e akuzuar për nxitje të kaosit, akuza që Nasman i mohon.
ÇËSHTJA E ASGJËSIMIT TË ARMËVE
Administrata Trump kërkon që armët e rënda të nxirren jashtë përdorimit menjëherë, ndërsa “armët personale të regjistrohen dhe të çaktivizohen sipas sektorëve, teksa policia e NCAG-së të fitojë aftësinë për të garantuar sigurinë personale”, sipas një dokumenti të shpërndarë nga Shtëpia e Bardhë javën e kaluar.
Një zyrtar amerikan tha të martën se luftëtarëve të Hamasit mund t’u ofrohej një formë amnistie. Mendohet se grupi militant ende zotëron raketa, të cilat disa diplomatë i vlerësojnë në qindra, si edhe mijëra armë të lehta, përfshirë pushkë.
Sipas burimeve, Hamasi ka pranuar së fundmi të diskutojë çarmatimin me fraksione të tjera palestineze dhe me ndërmjetës. Megjithatë, dy zyrtarë të Hamasit i thanë Reuters se as Uashingtoni dhe as ndërmjetësit nuk i kanë paraqitur ende grupit një propozim të detajuar dhe konkret për çarmatimin, shkruan Reuters.
Një zyrtar palestinez i afërt me bisedimet tha se SHBA-ja i është drejtuar Hamasit për të shqyrtuar mekanizma të mundshëm çarmatimi që do të përfshinin aktorë si Izraeli, Katari, Egjipti dhe Turqia.
“Hamas ka diskutuar mundësinë e neutralizimit të armëve, çka mund të realizohet nëse ka një armëpushim, dhe është i gatshëm për një armëpushim afatgjatë — pesë vjet ose edhe më shumë,” tha zyrtari.
“Por Hamasi beson fuqishëm se duhet të nisë një proces serioz negociatash politike për shtetësinë palestineze, në të cilin armët dhe luftëtarët do të kalonin nën autoritetin e Shtetit të Palestinës,” shtoi ai.
Hamasi nuk është i vetmi grup i armatosur në Gazë. Një burim nga një fraksion aleat me Hamasin tha se edhe grupet e tjera po diskutojnë çarmatimin, por shqetësohen se mund të mbeten të pambrojtura.
Në fjalimin e tij në parlament të hënën, kryeministri izraelit Netanyahu deklaroi se faza e ardhshme e marrëveshjes për Gazën “nuk ka të bëjë me rindërtimin”.
Sipas tij, “faza tjetër është çmilitarizimi i Rripit dhe çarmatimi i Hamasit.”
