Kryeministri kanadez Mark Carney deklaroi të dielën se Kanadaja nuk ka plane për të nënshkruar një marrëveshje të tregtisë së lirë me Kinën, duke iu përgjigjur kërcënimit të Presidentit amerikan Donald Trump për vendosjen e një tarife 100% mbi importet kanadeze nëse Otava do të vazhdonte me një marrëveshje të tillë me Pekinin.
Carney sqaroi se angazhimi i fundit me Kinën nuk përbën një marrëveshje tregtie të lirë, por thjesht parashikon ulje tarifash në disa sektorë të prekur rishtazi nga masa ndëshkuese, ndërsa Trump pretendoi të kundërtën në një postim ku akuzoi Kinën se po merr “kontroll të plotë” mbi Kanadanë.
Kryeministri theksoi se sipas marrëveshjes tregtare mes SHBA-së, Kanadasë dhe Meksikës (USMCA), vendi i tij ka detyrimin të mos ndjekë marrëveshje të tregtisë së lirë me ekonomi jo-tregu pa njoftim paraprak, duke shtuar se “Kanadaja nuk ka ndërmend ta bëjë këtë me Kinën apo me ndonjë ekonomi tjetër jo-tregu”.
Në vitin 2024, Otava ndoqi linjën e Uashingtonit duke vendosur tarifa 100% mbi automjetet elektrike kineze dhe 25% mbi çelikun dhe aluminin, masa që u pasuan nga kundërtarifa të ashpra nga Pekini ndaj vajit të kanolës, mishit të derrit dhe produkteve të detit kanadeze.
Megjithatë, gjatë një vizite të fundit në Kinë, Carney u shkëput nga kjo linjë duke ulur tarifën për automjetet elektrike kineze në këmbim të lehtësimeve për eksportet kanadeze, duke vendosur një kuotë fillestare prej 49,000 automjetesh në vit me një tarifë 6.1%, që pritet të rritet gradualisht në rreth 70,000 brenda pesë viteve, shkruan AP.
Ai theksoi se kjo përfaqëson rreth 3% të tregut vjetor prej 1.8 milionë automjetesh në Kanada dhe se, në këmbim, Kina pritet të nisë investime në industrinë kanadeze të automjeteve brenda tre viteve, ndërsa Trump shpërndau një video ku përfaqësues të industrisë paralajmëronin se sektori kanadez i automjeteve nuk mund të mbijetojë pa qasje në tregun amerikan.
