Ish-ministrit polak të Drejtësisë, Zbigniew Ziobro, i është dhënë azil politik nga Hungaria, pasi ai pretendon se po përballet me një ndjekje penale të motivuar politikisht në Poloni. Vendimi ka përkeqësuar më tej marrëdhëniet tashmë të tensionuara mes Varshavës dhe Budapestit.
Ziobro, një figurë kyçe e ish-qeverisë së krahut të djathtë Ligj dhe Drejtësi (PiS), e cila humbi pushtetin në vitin 2023 përballë koalicionit pro-BE të udhëhequr nga Donald Tusk, akuzohet për abuzim me detyrën dhe keqpërdorim fondesh publike. Gjatë mandatit të tij, ai ishte arkitekti kryesor i reformave në drejtësi që shkaktuan përplasje të ashpra me Bashkimin Evropian për shkak të shqetësimeve mbi shtetin e së drejtës.
Prokuroria polake ka ngritur 26 akuza ndaj Ziobros, përfshirë abuzim me pushtetin, keqpërdorim fondesh dhe drejtimin e një grupi kriminal. Ish-ministri i mohon të gjitha akuzat, duke i cilësuar ato si hakmarrje politike.
“Jam objekt i një fushate hakmarrjeje personale nga Donald Tusk dhe rrethi i tij,” shkroi Ziobro në rrjetin social X, duke pretenduar se po përballet me “metoda të stilit stalinist” për shtypjen e kundërshtarëve politikë.
Vendimi i Budapestit
Qeveria e kryeministrit hungarez Viktor Orbán i dha azil Ziobros vetëm disa ditë përpara se prokurorët polakë të pritej të kërkonin një urdhër-arresti ndërkombëtar. Ziobro nuk i është përgjigjur thirrjeve të përsëritura për t’u paraqitur para drejtësisë dhe ka qëndruar në Hungari, duke përmendur edhe arsye shëndetësore.
Avokati i tij, Bartosz Lewandowski, tha se azili u dha për shkak të “shkeljeve serioze të të drejtave dhe lirive themelore” me të cilat klienti i tij, sipas tij, po përballet në Poloni.
Përplasje politike dhe diplomatike
Orbán ka qenë për vite një aleat i ngushtë i PiS-it, por marrëdhëniet mes dy vendeve u ftohën pas vitit 2022, kur Hungaria mbajti qëndrime më të buta ndaj Rusisë pas pushtimit të Ukrainës. Rikthimi i Donald Tuskut në pushtet e ka thelluar më tej përplasjen politike mes Varshavës dhe Budapestit.
Në nëntor, parlamenti polak votoi heqjen e imunitetit parlamentar të Ziobros. Nëse shpallet fajtor për të gjitha akuzat, ai mund të përballet me deri në 25 vjet burg.
Vendimi i Hungarisë u dënua ashpër nga qeveria polake. Ministri i Jashtëm Radosław Sikorski reagoi me ironi në X, duke pyetur: “Stacioni i radhës Minsku apo Moska?”, në një referencë të drejtpërdrejtë ndaj marrëdhënieve të ngushta të Orbánit me Rusinë.
Sfondi i reformave në drejtësi
Ky nuk është rasti i parë i tillë. Në vitin 2024, Hungaria i dha azil edhe Marcin Romanowskit, ish-zëvendësministër i Drejtësisë nën drejtimin e Ziobros.
Reformat e ndërmarra nga Ziobro në sistemin gjyqësor çuan në bllokimin e miliarda eurove fonde të BE-së për Poloninë. Pas ardhjes në pushtet, Tusk u zotua të rikthente shtetin e së drejtës, çka bëri që Brukseli të zhbllokonte fondet. Megjithatë, zbatimi i reformave të reja ka hasur pengesa, pasi Presidenti Karol Nawrocki, i lidhur me PiS-in, ka përdorur veton për të bllokuar disa nisma ligjore të qeverisë, shkruan Financial Times.
