SHBA-ja ka njoftuar se po tërhiqet nga dhjetëra organizata ndërkombëtare që nuk u shërbejnë më interesave amerikane, duke përfshirë forume të rëndësishme të OKB-së dhe jashtë saj, të përqendruara te klima, emigrimi, politika sociale, paqja dhe demokracia.
Presidenti Donald Trump ka nënshkruar një memorandum që pezullon mbështetjen për gjithsej 66 organizata, agjenci dhe komisione “që veprojnë në kundërshtim me interesat kombëtare, sigurinë, prosperitetin ekonomik ose sovranitetin e SHBA-së,” tha Shtëpia e Bardhë të enjten.
“Këto tërheqje i japin fund mbështetjes së taksapaguesve për entitete që avancojnë agjenda globaliste mbi prioritetet e SHBA-së ose që trajtojnë çështjet kyçe në mënyrë joefikase,” thuhej në deklaratë, duke shtuar se shumë prej tyre kishin si synim “politika radikale të klimës, qeverisjen globale dhe programe ideologjike që bien ndesh me sovranitetin dhe fuqinë ekonomike të SHBA-së.”
Organizatat e prekura përfshijnë
UNFCCC: Trupi kryesor i OKB-së për negociatat mbi klimën.
UN Women: Organizata që merret me barazinë gjinore.
UNFPA: Agjencia kryesore për popullsinë dhe demografinë.
Ndër trupat jashtë OKB-së përfshihen:
IPCC: Një autoritet i rëndësishëm mbi shkencën e klimës, fitues i Çmimit Nobel për Paqen në vitin 2007.
IRENA: Agjencia Ndërkombëtare e Energjisë së Rinovueshme.
Forumi Global Kundër Terrorizmit.
Sekretari i Shtetit i SHBA-së, Marco Rubio, përshëndeti lëvizjen e Trump-it, duke i akuzuar këto organe se “kërkojnë në mënyrë aktive të kufizojnë sovranitetin amerikan.”
“Trump është i qartë: nuk do dërgohen më paratë e taksapaguesve amerikanë jashtë vendit me pak rezultate për t’u treguar,” tha Rubio në një deklaratë të lëshuar nga Departamenti i Shtetit, duke vënë në dukje se Uashingtoni do vijojë rishikimin e angazhimeve të tij në forume të tjera ndërkombëtare, shkruan Rt.
Këto tërheqje vijojnë pas daljes së hershme të Trump-it nga Marrëveshja e Parisit për klimën, OBSH (WHO), UNESCO, si dhe shkurtimet e fondeve për agjencitë e OKB-së, përfshirë UNRWA (për refugjatët palestinezë).
Një grup ligjvënësish republikanë propozuan vitin e kaluar që SHBA-ja të tërhiqet plotësisht nga OKB-ja, duke pretenduar se organizata tradhton interesat amerikane. Megjithëse Trump e ka kritikuar vazhdimisht atë, ai nuk ka njoftuar zyrtarisht plane për një tërheqje të plotë.
