Fermerët grekë kanë vendosur të përshkallëzojnë protestat në mbarë vendin për shkak të vonesave të subvencioneve, rritjes së kostove të prodhimit dhe ankesave të tjera, ndërsa kërkojnë gjithashtu një takim me kryeministrin Kyriakos Mitsotakis, vetëm pak orë pasi qeveria njoftoi një paketë masash të mërkurën.
Përfaqësuesit nga 18 bllokada dhe shoqata bujqësore i dërguan një letër ministrit të Zhvillimit Rural dhe Ushqimit, Kostas Tsiaras, duke kërkuar një takim me kryeministrin. Fermerët i hodhën poshtë menjëherë masat e qeverisë si të pamjaftueshme, duke thënë se ato dështojnë të adresojnë problemet e tyre kryesore.
Gjatë prezantimit të paketës, qeveria bëri të qartë se nuk do ofroheshin lëshime të mëtejshme, duke e lënë efektivisht lëvizjen e radhës në dorën e protestuesve.
Fermerët kanë zhvilluar protesta prej javësh, duke bllokuar rrugët dhe nyjet kryesore me traktorë. Thirrja e fundit për përshkallëzim vjen pas një lehtësimi të shkurtër të bllokadave për të lehtësuar udhëtimet gjatë periudhës së festave.
Në bllokadën e Nikajës pranë Larisës, në autostradën që lidh Athinën me Selanikun, fermerët vendosën të mbyllin tunelet e Tempes në të dyja drejtimet mëngjesin e së enjtes. Në Promachonas, pika kufitare mes Greqisë dhe Bullgarisë do qëndrojë e mbyllur për kamionët për 48 orë, nga e enjtja në mesditë deri të shtunën në mesditë, pas një vendimi të asamblesë së përgjithshme të fermerëve, shkruan Kathimerini.
Në Greqinë perëndimore, autostrada “Ionia Odos” dhe rrugët dytësore do të bllokohen nga mëngjesi i së enjtes deri të premten mbrëma. Në Greqinë qendrore, rrugët në zonën e Bralosit pritet të mbyllen nga ora 10:00 e së enjtes. Në jug, fermerët e Lakonisë deklaruan se do të bllokojnë rrugët kryesore kombëtare pranë Spartës nga ora 17:00 e së enjtes.
