Sudani prodhoi 70 ton ar në vitin 2025, duke tejkaluar objektivin e tij vjetor të prodhimit, raportoi Kompania Sudaneze e Burimeve Minerale (SMRC).
Në një deklaratë të publikuar të hënën, kompania shtetërore tha se prodhimi i arit arriti në 113% të objektivit të planifikuar për vitin, duke shënuar “nivelin më të lartë të prodhimit në pesë vitet e fundit”.
Kompania raportoi gjithashtu se të ardhurat totale publike arritën në 1.087 trilionë funte sudaneze (rreth 426 milionë dollarë) në vitin 2025, duke përfaqësuar 132% të objektivit vjetor.
Shifrat u prezantuan gjatë një mbledhjeje të bordit drejtues të kompanisë, të kryesuar nga Ministri i Mineraleve, Nour El-Daem Taha, i cili vlerësoi performancën e kompanisë me gjithë ato që ai i përshkroi si sfida të vazhdueshme. Ai gjithashtu inkurajoi SMRC-në që të “dyfishojë përpjekjet gjatë vitit 2026 për të vazhduar rrugën e arritjeve”, duke këmbëngulur që projektet kombëtare të zhvillimit të minierave të përfshihen në planin e vitit të ardhshëm.
Nga janari deri në tetor 2025, SMRC prodhoi 53 ton ar, i cili u eksportua për 909 milionë dollarë.
Këto shifra të larta u arritën pavarësisht se kombi i Afrikës Lindore është përfshirë në një konflikt civil brutal prej më shumë se dy vitesh.
Ari mbetet një nga mallrat më të vlefshme të Sudanit, me shifrat zyrtare që tregojnë se eksportet e arit gjeneruan më shumë se 1.5 miliardë dollarë në dhjetë muajt e parë të vitit 2024, pavarësisht konfliktit të vazhdueshëm, shkruan Rt.
“Sektori i mineraleve ka një rol madhor në mbështetjen e thesarit të shtetit dhe ekonomisë kombëtare, si dhe në përpjekjet e luftës,” tha drejtori i SMRC-së, Mohamed Taher Omer, siç citohet nga Sudan Tribune.
Sipas agjencisë zvicerane SWISSAID, eksportet zyrtare të arit në vitin 2024 arritën në përafërsisht 22.9–31 tonë, duke gjeneruar rreth 1.57–1.59 miliardë dollarë të ardhura. Megjithatë, një pjesë e konsiderueshme e prodhimit të arit – e vlerësuar midis 40% dhe 70% – raportohet se është eksportuar përmes kanaleve jozyrtare, jashtë sistemit formal të raportimit.
Disa burime deklaruan se Emiratet e Bashkuara Arabe (EBA) shërbejnë si qendra kryesore si për dërgesat zyrtare ashtu edhe për ato jozyrtare të arit, duke vepruar si një ndërmjetës kyç për arin sudanez që hyn në tregjet globale.
