Gjykata e Lartë e Shteteve të Bashkuara refuzoi të martën t’i japë dritën jeshile presidentit Donald Trump për dërgimin e trupave të Gardës Kombëtare në zonën e Çikagos, duke lënë në fuqi për momentin një urdhër gjyqësor që bllokon këtë veprim.
Vendimi përbën një goditje të rrallë për administratën Trump, e cila ka zgjeruar përdorimin e ushtrisë për qëllime të brendshme, veçanërisht në juridiksione të drejtuara nga demokratët.
Gjykatësit lanë në fuqi vendimin e një gjykatësi federal që ndalon dislokimin e qindra trupave të Gardës Kombëtare, pas padisë së ngritur nga autoritetet e Illinois dhe drejtuesit lokalë të Çikagos.
Departamenti amerikan i Drejtësisë kishte kërkuar që dislokimi të lejohej ndërsa procesi gjyqësor vazhdon, sipas Reuters.
Në një urdhër të paemëruar, shumica e Gjykatës së Lartë theksoi se “në këtë fazë paraprake, qeveria nuk ka arritur të identifikojë një burim autoriteti që do t’i lejonte ushtrisë të zbatojë ligjet në Illinois”, duke shtuar se autoriteti i presidentit për të marrë kontrollin federal të Gardës Kombëtare zbatohet vetëm në rrethana “të jashtëzakonshme”. Tre gjyqtarë konservatorë – Samuel Alito, Clarence Thomas dhe Neil Gorsuch – shprehën kundërshtimin e tyre ndaj këtij vendimi.
Shtëpia e Bardhë reagoi duke thënë se presidenti Trump “u ka premtuar amerikanëve se do të punojë pa u lodhur për të zbatuar ligjet e emigracionit dhe për të mbrojtur personelin federal nga trazirat e dhunshme”, duke shtuar se vendimi i sotëm “nuk e cenon këtë axhendë thelbësore”.
Nga ana tjetër, guvernatori i Illinois, JB Pritzker, e përshëndeti vendimin si “një hap të rëndësishëm për të frenuar abuzimin e vazhdueshëm të pushtetit nga administrata Trump dhe për të ngadalësuar marshimin e tij drejt autoritarizmit”.
Ky zhvillim vjen në një kontekst tensionesh të forta politike, ku Trump ka urdhëruar dërgimin e trupave në Çikago dhe Portland, pas dislokimeve të mëparshme në Los Angeles, Memphis dhe Uashington, D.C.
Presidenti dhe aleatët e tij kanë përshkruar qytetet e drejtuara nga demokratët si të përfshira nga kaosi dhe protestat e dhunshme, ndërsa autoritetet lokale dhe kritikët e Trump i kanë quajtur këto pretendime të ekzagjeruara dhe një pretekst për përdorimin e ushtrisë kundër kundërshtarëve politikë.
Gjykatësit federalë kanë shfaqur skepticizëm ndaj përshkrimit të administratës për protestat kundër politikave të ashpra të emigracionit, të cilat, sipas autoriteteve vendore, kanë qenë kryesisht paqësore dhe të menaxhueshme nga forcat lokale të rendit.
Gjyqtarja federale April Perry, e cila bllokoi përkohësisht dislokimin më 9 tetor, theksoi se nuk kishte prova për rebelim apo për pamundësi të zbatimit të ligjit, duke kritikuar autoritetet për “barazimin e protestave me trazira dhe mungesën e vlerësimit për spektrin e gjerë mes qytetarëve që kritikojnë qeverinë dhe atyre që ushtrojnë dhunë”. Ajo paralajmëroi se një dislokim i Gardës Kombëtare “vetëm do t’i hidhte benzinë zjarrit”.
Një panel prej tre gjyqtarësh i Gjykatës së Apelit të Qarkut të 7-të refuzoi gjithashtu të rrëzonte vendimin e Perry-t, duke arritur në përfundimin se “faktet nuk e justifikojnë veprimin e presidentit në Illinois”.
Dy nga tre gjyqtarët e këtij paneli ishin emëruar nga presidentë republikanë, përfshirë një nga vetë Trump.
Administrata Trump ka argumentuar se trupat janë të nevojshëm për të mbrojtur pronën dhe personelin federal në një qendër ndalimi të Shërbimit të Emigracionit dhe Doganave (ICE) në Broadview, e cila është kthyer në pikë tensioni për aktivistët kundër politikave të emigracionit.
Autoritetet e Illinois dhe Çikagos, nga ana e tyre, kanë deklaruar se protestat “nuk e kanë penguar kurrë funksionimin e vazhdueshëm” të kësaj qendre dhe se çdo incident sporadik është menaxhuar nga forcat lokale.
Çështja mbetet e hapur, ndërsa Gjykata e Lartë ka kërkuar argumente të mëtejshme lidhur me interpretimin e ligjit që i jep presidentit të drejtën të përdorë Gardën Kombëtare për zbatimin e ligjit, duke e lënë për momentin të bllokuar dislokimin e trupave në zonën e Çikagos.
