Presidenti i SHBA-së, Donald Trump, ka pezulluar programin e llotarisë së kartës jeshile (Green Card), pasi zyrtarët deklaruan se i dyshuari për të shtënat në Universitetin Brown dhe Institutin e Teknologjisë të Masaçusetsit (MIT) kishte hyrë në vend përmes këtij sistemi.
Sekretarja e Sigurisë Kombëtare, Kristi Noem, tha vonë të enjten se, me udhëzimin e Trump-it, Shërbimet e Shtetësisë dhe Imigrimit të SHBA-së do ndalojnë menjëherë programin e Vizave të Diversitetit (DV1), i cili u mundëson fituesve të llotarisë të bëhen banorë të përhershëm të SHBA-së.
Njoftimi i Noem pasoi një kërkim pesëditor për shtetasin portugez 48-vjeçar, Claudio Manuel Neves-Valente, të cilin autoritetet e dyshojnë për vrasjen e dy studentëve dhe plagosjen e nëntë të tjerëve në një sulm me armë në Universitetin Brown të shtunën, përpara se të qëllonte për vdekje profesorin e MIT-it, Nuno Loureiro, dy ditë më vonë në Brookline, Masaçusets. Zyrtarët thanë se i dyshuari më vonë i dha fund jetës dhe u gjet i vdekur në New Hampshire me një plagë të shkaktuar nga vetja.
“Ky individ i poshtër nuk duhet të ishte lejuar kurrë në vendin tonë,” shkroi Noem në X, duke iu referuar Valentes.
Sipas një deklarate nën betim të cituar nga autoritetet, Valente erdhi fillimisht në SHBA me një vizë studenti në vitin 2000 dhe më vonë fitoi kartën jeshile përmes Llotarisë së Vizave të Diversitetit në vitin 2017.
Programi i vizave të diversitetit vë në dispozicion çdo vit deri në 50,000 viza emigrimi përmes llotarisë për njerëz nga vende me norma të ulëta emigrimi në SHBA. Fituesit dhe bashkëshortët e tyre i nënshtrohen verifikimit dhe intervistave përpara se të pranohen.
Noem tha se pezullimi ka për qëllim të “sigurojë që asnjë amerikan tjetër të mos dëmtohet nga ky program katastrofik”, duke shtuar se Trump e kishte kundërshtuar prej kohësh llotarinë, shkruan Rt.
Lëvizja pason kufizime më të gjera të emigrimit nga administrata Trump javët e fundit, duke përfshirë rishikime më të rrepta të rrugëve të tjera ligjore të emigrimit pas një incidenti tjetër me të shtëna në Uashington, D.C., ku ishte përfshirë një i dyshuar që erdhi në SHBA përmes një programi tjetër emigrimi.
Trump nisi një goditje ndaj emigrimit të paligjshëm pasi u rikthye në Shtëpinë e Bardhë në janar. Ai ka rritur bastisjet e emigrimit dhe u zotua të kryejë deportimin më të madh në historinë e SHBA-së, duke prioritizuar largimin e kriminelëve të rrezikshëm.
