Nuk ka më zi buke në Gaza, njoftoi të premten një monitorues i urisë i mbështetur nga Kombet e Bashkuara, pas një fluksi të ndihmave humanitare në Rrip pas një armëpushimi të arritur në tetor midis Izraelit dhe Hamasit.
“Pas një reduktimi të ndjeshëm të konfliktit, një plani të propozuar për paqe dhe aksesit të përmirësuar për shpërndarjen e ushqimit humanitar dhe komercial, kushtet e sigurisë ushqimore janë përmirësuar në Rripin e Gazës”, tha Klasifikimi i Fazës së Integruar të Sigurisë Ushqimore (IPC).
“Asnjë zonë nuk është klasifikuar në Zi Urie”, shtoi ai.
Organizata mbikëqyrëse globale kishte thënë në gusht se pjesë të Gazës po përjetojnë zyrtarisht një uri të shkaktuar nga njeriu.
Megjithatë, organizata vuri në dukje se, pavarësisht këtyre përmirësimeve, shumica e popullsisë së Gazës përballet me nivele të larta të pasigurisë akute ushqimore, shkruan CNN.
“Edhe pse ndihma humanitare, përfshirë ndihmën ushqimore, është rritur, po plotësohen vetëm nevojat themelore të mbijetesës”, tha IPC.
Ndërsa klasifikimi i Gazës ka ndryshuar, IPC paralajmëroi se rreziku që enklava të bjerë përsëri në zi buke mbetet.
“Në skenarin më të keq që përfshin armiqësi të përtërira dhe një ndalesë të flukseve humanitare dhe tregtare, Gaza Veriore, Guvernatori i Gazës, Deir al-Balah dhe Khan Younis do të përballen me rrezikun e urisë deri në mesin e prillit 2026”, tha ai.
