Seanca e fundit plenare e këtij sesioni parlamentar u shoqërua me tensione të forta dhe kaos në Kuvend. Deputetët e opozitës hynë herët në sallë dhe zunë karriget e kabinetit qeverisës, duke u përplasur fizikisht me gardistët që tentuan t’i largonin.
Opozita kundërshtoi betimin e Endri Shabanit si Avokat i Popullit, i zgjedhur vetëm me votat e PS. Endri Shabani u betua si Avokat Populli në seancën plenare mes kaosit të opozitës, të cilët ndezën në sallë edhe flakadanë.
Pas betimit, ai përshëndeti deputetët e opozitës me puthje dhe u largua nga salla.Në nisje të seancës, deputeti Belind Këlliçi ndezi flakadan, ndërsa deputetët e PD hodhën ujë dhe kartonë votimi në drejtim të kryetarit të Kuvendit, Niko Peleshi.
Gazment Bardhi përplaset me ministrin e drejtësisë, Besfort Lamallari.
“Do ikësh me Belindën, mbylle gojën, mbylle gojën o shamia e qyrreve të Belindës. Mbylle gojën miush”, tha Bardhi.
Tensionet në Kuvend u përshkallëzuan më tej gjatë seancës plenare. Deputeti i PD Flamur Noka u përjashtua nga seanca pasi i hodhi ujë një gardisti. Menjëherë pas rifillimit të seancës nga kryetari i Kuvendit, Niko Peleshi, deputetët demokratë ndezën një tjetër flakadan në sallë.
Deputetja Elda Hoti hodhi ujë në drejtim të gardistëve, të cilët rrethuan deputetët e opozitës që kishin zaptuar karriget e ministrave, duke u përpjekur t’i largonin. Opozitarët refuzuan të tërhiqeshin dhe vijuan të hedhin sende në drejtim të Peleshit.
Një tjetër flakadan u ndez në sallë nga deputetja Albana Vokshi, ndërsa në zonën e kabinetit qeverisës pati shtyrje dhe përplasje mes deputetëve të PD dhe Gardës. Deputeti Bledion Nallbani dhe disa deputetë të tjerë u konfrontuan fizikisht me efektivët.
Ndërkohë, jashtë ambienteve të Kuvendit, fibrat e transmetimit të televizioneve u përfshinë nga flakët. Shkaqet e zjarrit ende nuk dihen.
Pas 1 orë tensionesh, Peleshi mbylli seancën plenare.
Sapo Peleshi deklaroi mbylljen e seancës, deputetët e opozitës ironizuan duke shtuar; bravo Dubai!
