Qeveria po përpiqet të zhbllokojë me shpejtësi pagesat e vonuara në sektorin bujqësor, në një kohë kur protestat e fermerëve po përshkallëzohen në të gjithë vendin. Bllokadat rrugore, si dhe përplasjet e fundit, kanë ngritur shqetësime serioze për rendin publik dhe ndikimin në ekonomi.
Sipas burimeve zyrtare, të paktën 40 bllokada bujqësore janë aktive në nivel kombëtar, ndërsa pikat ekzistuese të protestës po përforcohen nga dita në ditë. Tensionet janë rritur pas incidenteve të dhunshme të raportuara në aeroportet e Kretës dhe jashtë zyrës së Ministrit të Zhvillimit Bujqësor, Kostas Tsiaras, në Karditsa.
Fermerët kanë ashpërsuar qëndrimin e tyre dhe po mbajnë të paqartë afatin e mobilizimeve, me synimin për të rritur presionin përpara dialogut. Ministri Tsiaras ka deklaruar se qeveria është e gatshme për bisedime të menjëhershme, duke theksuar se nevojitet një përfaqësim i qartë i fermerëve dhe një listë konkrete kërkesash. Ai la të hapur mundësinë e rishikimit të kuotave të naftës bujqësore dhe zgjatjes së programit GAIA për subvencionimin e energjisë elektrike.
Megjithatë, mungesa e një përfaqësimi të unifikuar mbetet problematike, pasi protestat drejtohen nga liderë lokalë dhe përfshijnë fermerë me përkatësi të ndryshme politike, nga Partia Komuniste deri te Demokracia e Re në pushtet.
Në qendër të pakënaqësive qëndrojnë vonesat në pagesa. Autoriteti grek i pagesave bujqësore, OPEKEPE, rihapi përkohësisht platformën për ankesa, pasi rreth 140 mijë prodhues u përjashtuan nga pagesat paradhënie për shkak të problemeve me hartat satelitore. Ende mbetet e paqartë se sa do të zgjasë procesimi i këtyre ankesave.
Një problem edhe më i ndërlikuar prek mbi 13 mijë blegtorë që nuk morën pagesa për mungesë të deklarimit të tokave të mjaftueshme kullotash, kryesisht në Kretë, Serres dhe Larissa. Ministria po shqyrton një “zgjidhje teknike të butë”, por Kooperativat Bujqësore kanë paralajmëruar se kjo mund të hapë rrugë për kërkesa të ngjashme nga rajone të tjera.
Situata në Kretë është përkeqësuar ndjeshëm. Në Iraklio, fermerët depërtuan në zonën e aeroportit dhe hynë në pistë, ndërsa në Hania pati përplasje të dhunshme me policinë, që përfshinë hedhje gurësh dhe përdorim të gazit lotsjellës. Një oficer policie mbeti i plagosur dhe disa protestues u identifikuan si persona me precedentë penalë.
Të përfshirët përballen me akuza të rënda, përfshirë formimin e organizate kriminale, tentativa vrasjeje, shkelje të ligjit për armët, dhunë fizike dhe prishje të rendit publik.
Kryeministri Kyriakos Mitsotakis riafirmoi gatishmërinë për dialog, por paralajmëroi se dhuna nuk do të tolerohet. Ai theksoi se bisedimet duhet të zhvillohen pa bllokada dhe brenda kufijve fiskalë të Bashkimit Evropian. Ndërkohë, fermerët kanë paralajmëruar një përshkallëzim të ri të protestave, me plane për bllokimin e portit të Volosit, ku pritet t’u bashkohen edhe peshkatarët, shkruan Kathimerini.
