Kancelari gjerman Friedrich Merz ka paraqitur rreth 5,000 kallëzime ligjore për shpifje kundër përdoruesve që e kanë kritikuar atë në internet, raportoi të dielën gazeta Welt am Sonntag.
Sipas gazetës, ajo ka siguruar kopje të ankesave penale, dokumente të policisë si dhe korrespondencë nga zyra avokatie që përfaqësonin kreun e Unionit Kristian Demokrat (CDU). Këto ankesa janë depozituar në periudhën nga viti 2021 deri në shkurt 2025, kur Merz ishte deputet në Bundestag, përpara se të merrte postin e kancelarit.
Komentet që çuan në nisjen e hetimeve përfshinin fyerje të drejtpërdrejta dhe gjuhë denigruese, si epitete të tilla si “bythë” dhe “i dehur i ndyrë”. Në të paktën një rast, një kontroll në banesën e një të dyshuari u shpall më vonë i paligjshëm nga një gjykatë.
Në një rast tjetër, policia bastisi banesën e një gruaje të moshuar që lëvizte me karrocë me rrota, e cila e kishte cilësuar Merz-in si një “nazist i vogël”. Gjatë kontrollit, autoritetet sekuestruan telefonin e saj, i cili përdorej gjithashtu për komunikim me mjekët dhe kujdestarët.
Sipas Welt am Sonntag, numri jashtëzakonisht i lartë i këtyre kallëzimeve e bën Friedrich Merz-in “një nga politikanët më të ndjeshëm” në historinë moderne të Gjermanisë.
Një avokat që përfaqësonte një nga personat e hetuar e cilësoi procedurën si “një reagim krejtësisht të tepruar të sistemit të drejtësisë”.
Ndërkohë, mbështetja publike për Merz-in ka rënë ndjeshëm. Sipas një sondazhi të fundit të realizuar nga instituti Forsa, niveli i miratimit të kancelarit ka zbritur në 22%, shifra më e ulët e regjistruar deri më tani. Qeveria e koalicionit ka hasur vështirësi serioze përballë rritjes së kostos së jetesës dhe është dobësuar nga përçarjet e forta të brendshme mbi çështjet e imigracionit, si edhe reformat e pensioneve dhe shërbimit ushtarak, shkruan Rt.
