Votuesit në Republikën Serbe autonome të Bosnjës dolën në votime për një president të ri në një zgjedhje të parakohshme të dielën, të shpallura pasi ish-presidenti Milorad Dodik, u shkarkua nga detyra dhe iu ndalua të mbajë funksione politike për gjashtë vjet.
Votimi do përcaktojë nëse rajoni i mbizotëruar nga serbët e Bosnjës do largohet nga axhenda nacionaliste e Dodikut, apo do vijojë me politikat separatiste që rrezikojnë kohezionin e brendshëm të vendit të brishtë ballkanik.
Separatisti pro-rus Dodik u dënua në shkurt për sfidimin e Gjykatës Kushtetuese dhe një të dërguari ndërkombëtar të paqes, duke çuar në krizën më të madhe politike të Bosnjës që nga fundi i luftës shkatërruese 30 vjet më parë, shkruan Reuters.
Ai e kundërshtoi në mënyrë të përsëritur vendimin, i cili u la në fuqi nga një këshill apelimi në gusht dhe nga Gjykata Kushtetuese në fillim të këtij muaji, por në tetor emëroi papritur një aleat besnik si zëvendësues të tij të përkohshëm.
Bosnja e pasluftës përbëhet nga Republika Serbe dhe Federata, e ndarë nga kroatët dhe boshnjakët, të lidhura përmes një qeverie qendrore të dobët.
Kompetencat e presidentëve të rajoneve janë kryesisht ceremoniale, por Dodik, i cili ka mbajtur poste të larta qeveritare në rajonin serb për shumicën e 25 viteve të fundit, kishte uzurpuar të gjitha kompetencat ekzekutive gjatë mandateve të tij.
