Ministrja e Jashtme, Elisa Spiropali, gjatë një takimi zyrtar me homologun gjerman Johann Walter David Rudolf, theksoi se orientimi europian i Shqipërisë nuk shihet thjesht si një objektiv politik, por si model i mënyrës se si qytetarët shqiptarë duan të jetojnë dhe qeverisen.
Në deklaratën e saj, Spiropali vlerësoi qëndrimin e Gjermanisë si një partner të qëndrueshëm dhe të besueshëm për Shqipërinë dhe Ballkanin Perëndimor.
“Faleminderit për qartësinë e mendimit dhe forcën e bindjes me të cilën Gjermania mike qëndron si shtyllë e besueshme në krah të Shqipërisë dhe Ballkanit Perëndimor”, u shpreh ministrja, duke nënvizuar se mbështetja e Berlinit shtrihet përtej deklaratave politike dhe vërtetohet me veprime konkrete.
Spiropali shtoi se Shqipëria do të vazhdojë me ritme të larta punën për forcimin e shtetit të së drejtës dhe thellimin e reformave demokratike:
“Ne vijojmë udhëtimin tonë me besim të qetë e përkushtim të thellë: të ngremë shtetin e së drejtës mbi themele të forta, të ruajmë ritmin e reformave dhe të ndërtojmë ekonomi që qëndron mbi konkurrencë, drejtësi dhe besim publik.”
Ajo theksoi se Europa, për Shqipërinë, “nuk është vetëm destinacion, por mënyra se si duam të jetojmë, të mendojmë e të qeverisim çdo ditë.”
Takimi me ministrin Rudolf vjen në një moment kur Shqipëria ka hapur të gjitha grupkapitujt e negociatave me Bashkimin Europian, duke shënuar një fazë të re në procesin e integrimit.
