Shefi i Shtabit të Forcave të Mbrojtjes së Izraelit (IDF), gjenerallejtënant Eyal Zamir, deklaroi se ushtria duhet të jetë e përgatitur për të zgjeruar operacionet tokësore në Gaza, nëse situata e kërkon këtë.
Deklaratat u bënë gjatë një vlerësimi situacional në Divizionin e Gazës dhe një vizite në zonën e Rafahut, ku ai u shoqërua nga komandanti i Komandës së Jugut, gjeneralmajor Yaniv Asor, si dhe komandantë të tjerë të divizioneve dhe brigadave, përcjell Ynet.
Zamir tha se, edhe një muaj pas hyrjes në fuqi të armëpushimit si pjesë e marrëveshjes për lirimin e pengjeve, realiteti operacional mbetet i paqëndrueshëm dhe kërkon gatishmëri të vazhdueshme.
Ai theksoi se IDF duhet të jetë gati të kalojë me shpejtësi në një ofensivë të gjerë për të vendosur kontroll operacional mbi zona përtej të ashtuquajturës “Linjë e Verdhë”.
“Së bashku me procesin aktual operacional, duhet të jemi gati për një lëvizje të shpejtë drejt aktivitetit në shkallë të gjerë për të vendosur kontroll në zona të Rripit të Gazës përtej Linjës së Verdhë,” tha ai.
Zamir deklaroi se ushtria izraelite kontrollon aktualisht më shumë se gjysmën e territorit të Gazës, pa marrë kontroll mbi popullsinë civile. Ai tha se operacionet po zhvillohen përgjatë Linjës së Verdhë, ku forcat izraelite synojnë pastrimin e zonës dhe eliminimin e xhepave të mbetur të militantëve.
Sipas tij, Linja e Verdhë është një perimetër kyç për frenimin dhe kontrollin, ndërsa trupat janë duke punuar për të parandaluar rindërtimin e aftësive të Hamasit duke mbajtur pozicione strategjike dhe kontrolluar pikat hyrëse në Rrip.
Komanda e Jugut, shtoi ai, do të vazhdojë fushatën për eliminimin e militantëve dhe shkatërrimin e tuneleve dhe infrastrukturës nëntokësore, duke ruajtur njëkohësisht mbrojtjen e forcave izraelite.
Në kuadër të armëpushimit aktual, Zamir theksoi se Izraeli do të insistojë që Hamas të mos rikthehet në pushtet në Gaza.
“Edhe nëse kërkon kohë, ne do të vazhdojmë misionin për të çmontuar Hamasin dhe çmilitarizuar Gazën, qoftë përmes një marrëveshjeje, qoftë përmes mjeteve ushtarake,” tha ai.
Shefi i IDF foli edhe për hetimet e thella që po kryhen mbi dështimet e 7 Tetorit. Ai tha se e ka ngritur komisionin e ekspertëve menjëherë pasi mori detyrën, i udhëhequr nga parimi i transparencës dhe domosdoshmëria për të mësuar nga gabimet.
“Nuk do të kemi frikë nga implikimet. Çdo gjë bëhet për të avancuar IDF-in drejt zhvillimit dhe përmirësimit,” theksoi Zamir.
Duke përmbyllur deklaratën e tij, ai u shpreh:
“Do t’i kujtojmë ngjarjet e 7 Tetorit përgjithmonë, por edhe arritjet e rëndësishme në të gjitha frontet. Para nesh është detyra e rishikimit të gjithë luftës. Kjo është një luftë heroike dhe meritat u takojnë juve. Unë dhe i gjithë populli i Izraelit vlerësojmë veprimet dhe arritjet tuaja.”
