Tre vende në Indi kanë ndaluar përdorimin e një shurupi për kollë, pasi të paktën nëntë fëmijë humbën jetën dyshohet nga konsumimi i tij, njoftuan autoritetet për DW.
Ministria e Shëndetësisë në Indi tha se mostrat e shurupit Coldrif, i prodhuar nga kompania Sresan Pharma në Tamil Nadu, përmbanin dietilen glikol (DEG), një substancë industriale shumë toksike edhe në sasi të vogla.
Në testime, nivelet e DEG rezultuan mbi kufirin e lejuar, dhe për këtë arsye, shitja e këtij shurupi është ndaluar në të gjithë Madhya Pradesh, shteti ku ndodhi shumica e vdekjeve, sipas kryeministrit Mohan Yadav.
Ai njoftoi gjithashtu ndalimin e shitjes së produkteve të tjera të kompanisë Sresan Pharma.
Shtetet Tamil Nadu dhe Kerala, që ndodhen pranë njëra-tjetrës, kanë marrë të njëjtën masë, ndërsa shteti jugor Telangana ka lëshuar një paralajmërim publik për Coldrif.
Ky incident ka rikthyer vëmendjen ndaj industrisë farmaceutike të Indisë.
Në vitin 2022, Organizata Botërore e Shëndetësisë lidhi shurupat për kollë të një kompanie tjetër indiane me vdekjen e 70 fëmijëve në Gambia, por autoritetet indiane e mohuan këtë.
Një vit më vonë, OBSH paralajmëroi përsëri për dy ilaçe për kollë të prodhuara në Indi, pasi Uzbekistan raportoi vdekjen e të paktën 18 fëmijëve pas përdorimit të tyre.
Edhe Irakut iu desh të lëshonte paralajmërime për medikamente të kontaminuara që vinin nga India.
India furnizon rreth 20% të barnave gjenerike në botë, që janë versione më të lira të barnave origjinale, të prodhuara pasi skadojnë patentat.
Industria farmaceutike indiane renditet e treta në botë për nga volumi i prodhimit.
Një studim i vitit 2011 tregoi se barnat gjenerike janë 5-6 herë më të lira se ato me markë, pa ndryshime të mëdha në cilësi.
