Pakistani, së bashku me disa shtete kryesore myslimane, ka shprehur mbështetje të fortë për nismën e presidentit amerikan Donald Trump për t’i dhënë fund luftës në Rripin e Gazës.
Në një deklaratë të përbashkët, ministrat e Jashtëm të Pakistanit, Jordanisë, Emirateve të Bashkuara Arabe, Indonezisë, Turqisë, Arabisë Saudite, Katarit dhe Egjiptit vlerësuan lidershipin e Trump dhe shprehën besim se përpjekjet e tij mund të hapin rrugën për paqe, përcjell JPost.
Deklarata nënvizoi gatishmërinë për të bashkëpunuar me Shtetet e Bashkuara dhe palët e tjera të përfshira për një marrëveshje gjithëpërfshirëse, që garanton ndihmë humanitare, shmangien e shpërnguljeve, lirimin e pengjeve dhe krijimin e kushteve për një zgjidhje me dy shtete.
Presidenti Trump tha se ka zhvilluar bisedime të gjata me liderët rajonalë, përfshirë kryeministrin izraelit Benjamin Netanyahu, dhe shpalli “parimet për paqe” të mbështetura nga disa vende arabe dhe myslimane. Ai falënderoi veçanërisht Pakistanin, duke përmendur rolin e kryeministrit Shehbaz Sharif dhe të shefit të ushtrisë, Asim Munir.
Nga ana e tij, Sharif deklaroi se implementimi i propozimit për dy shtete është thelbësor për të siguruar paqe afatgjatë në rajon, duke e cilësuar nismën si hap pozitiv për stabilitet politik dhe rritje ekonomike.
Megjithatë, qëndrimi i qeverisë pakistaneze ka sjellë reagime të ashpra brenda vendit. Kritikët e akuzojnë kryeministrin se po e barazon mbështetjen për një plan paqeje me njohjen e Izraelit, ndërsa grupe opozitare thonë se një marrëveshje e tillë nuk mund të pranohet pa respektuar plotësisht të drejtat e palestinezëve.
Ekspertët ndërkohë theksojnë se mbështetja e Pakistanit rrit peshën e tij në diplomacinë rajonale, sidomos pas marrëveshjes së fundit të mbrojtjes me Arabinë Saudite, duke e vendosur Islamabadin si një faktor kyç në përpjekjet për paqe në Lindjen e Mesme.
