Një gjykatë federale ka dhënë të martën një urdhër të përkohshëm ndalues, duke bllokuar për momentin shkarkimin e guvernatores së Rezervës Federale, Lisa Cook, nga Presidenti Donald Trump.
Ky vendim do të thotë që Cook do të mbetet anëtare e bordit të bankës qendrore derisa çështja e saj të shqyrtohet më në detaje. Ajo do të vazhdojë të kryejë detyrat e saj gjatë kësaj periudhe.
Në arsyetimin e saj, gjykatësja federale Jia Cobb deklaroi: “Gjykata do të lëshojë një urdhër që i kërkon Kryetarit të Rezervës Federale, Jerome Powell, dhe Bordit të Guvernatorëve të lejojnë Cook të vazhdojë funksionimin si anëtare e Bordit gjatë kohës së këtij procesi.”
Gjykatësja Cobb shtoi se “interesi publik për pavarësinë e Rezervës Federale e mbështet rivendosjen e Cook. Kjo pavarësi është kritike për të ndihmuar sistemin bankar të vendit të promovojë stabilitet.”
Avokatët e Cook argumentuan para gjykatës federale në Uashington se përpjekja e Trump për ta shkarkuar atë për “mashtrim hipotekor” ishte e paligjshme dhe pa “arsye ligjore,” e cila është e vetmja bazë për të larguar një guvernator të Rezervës Federale, përcjell NBC.
Vendimi i gjykatës do t’i mundësojë Cook të marrë pjesë në takimin dy-ditor të Rezervës Federale, i cili fillon më 16 shtator, ku banka qendrore pritet të vendosë për uljen e normave të interesit.
Zëdhënësi i Shtëpisë së Bardhë, Kush Desai, deklaroi: “Ky vendim nuk do të jetë vendimi përfundimtar në këtë çështje, dhe Administrata Trump do të vazhdojë të punojë për të rivendosur përgjegjshmërinë dhe besimin tek Rezerva Federale.”
Avokati që përfaqëson Cook, Abbe Lowell, tha: “Vendimi i sotëm njihet dhe riafirmon rëndësinë e mbrojtjes së pavarësisë së Rezervës Federale nga ndërhyrjet e paligjshme politike. Lejimi i Presidentit të shkarkojë në mënyrë të paligjshme Guvernatoren Cook mbi akuza të paqëndrueshme dhe të paqartë do të rrezikonte stabilitetin e sistemit tonë financiar dhe do të minonte sundimin e ligjit. Guvernatorja Cook do të vazhdojë të kryejë detyrat e saj të betuara si anëtare e Bordit të konfirmuar nga Senati.”
Lisa Cook është gruaja e parë e zezë që shërben si guvernatore në historinë mbi 110-vjeçare të Bordit të Rezervës Federale. Para se t’i bashkohej Rezervës, ajo ishte profesoreshë e ekonomisë dhe marrëdhënieve ndërkombëtare në Michigan State University.
