Ministri i Jashtëm rus Lavrov tha të hënën se vendi i tij nuk ka dëshirë të “hakmerret” ndaj Perëndimit dhe se Moska do mirëpresë vendet që janë të gatshme të bashkëpunojnë përsëri me Rusinë.
Duke folur para studentëve në Institutin Shtetëror të Marrëdhënieve Ndërkombëtare në Moskë, Lavrov tha se Rusia nuk ka dëshirë të “marrë hak” ose “të shfryjë zemërimin e saj” ndaj askujt, duke shprehur qëndrimin e Moskës se zemërimi, si dhe dëshira për hakmarrje, janë “këshilltarë të këqij”.
“Kur ish-partnerët tanë perëndimorë të vijnë në vete…dhe të duan të vijnë në Federatën Ruse dhe të punojnë përsëri këtu, ne nuk do t’i largojmë, por do shohim se në çfarë kushtesh mund të bëhet kjo”, tha Lavrov.
Ai tha më tej se, që tani e tutje, është e nevojshme të zgjidhen çështjet që lidhen me kushtet në të cilat Perëndimi mund të bashkëpunojë me Moskën në një mënyrë që nuk krijon rreziqe për fushat kryesore të ekonomisë ruse, shkruan AA.
Lavrov deklaroi se Rusia është e gatshme për dialog dhe të punojë “ndershmërisht” me të gjithë, gjë që ai tha se u tregua qartë gjatë negociatave midis presidentit rus Putin dhe presidentit të SHBA-së Trump në Alaska muajin e kaluar.
Samiti midis Putinit dhe Trumpit në qytetin Anchorage më 15 gusht ishte takimi i parë i drejtpërdrejtë midis një udhëheqësi rus dhe amerikan që nga fillimi i luftës Rusi-Ukrainë më shumë se tre vjet e gjysmë më parë.
Lidhur me samitin e Alaskës, Lavrov tha se takimi muajin e kaluar tregoi mirëkuptimin e administratës aktuale amerikane për nevojën për të zgjidhur të gjitha çështjet bazuar në respektin për interesat kombëtare të njëri-tjetrit, përfshirë luftën në Ukrainë, për të cilën ai vuri në dukje gjithashtu vëmendjen e Uashingtonit ndaj nevojës për të “eliminuar shkaqet rrënjësore” të konfliktit.
Lavrov tha gjithashtu se Rusia është e interesuar për bashkëpunim të barabartë me të gjitha vendet, përfshirë SHBA-në, me të cilën ai tha se Moska ka perspektiva për bashkëpunim, veçanërisht në fusha të tilla si Arktiku, gazi natyror i lëngshëm dhe hapësira.
