Një stuhi e fortë e shoqëruar me reshje të dendura shiu dhe breshëri ka goditur pasditen e sotme rrethin e Gramshit, duke shkaktuar dëme të konsiderueshme në sipërfaqe të mëdha të mbjella me kultura bujqësore.
Gazetari Shkëlzen Henkoja, përmes një lidhjeje telefonike me fermerin Leonard Shuli nga fshati Kukur, raporton se stuhia ka zgjatur për rreth 15 minuta dhe ka shkatërruar qindra dynymë me prodhime të ndryshme.
Sipas z. Shuli, dëmet më të mëdha janë regjistruar në parcelat me agrume dhe në vreshtari, ku humbjet janë të konsiderueshme. Fermerët e zonës shprehen të shqetësuar për pasojat e kësaj stuhie që, në pak minuta, ka dëmtuar rëndë të ardhurat e tyre të pritshme.
Aktualisht nuk ka ende informacion të detajuar mbi gjendjen e rrugëve apo ndonjë ndërhyrje nga autoritetet lokale. Fermerët kërkojnë vlerësim të shpejtë të dëmeve dhe mbështetje për të përballuar pasojat ekonomike.
