Një prej ndihmësve më të lartë të Presidentit Donald Trump akuzoi Indinë të dielën se po financon në mënyrë efektive luftën e Rusisë në Ukrainë përmes blerjes së naftës nga Moska, në një përshkallëzim të retorikës amerikane ndaj një prej partnerëve kyç në rajonin Indo-Paqësor.
“Presidenti Trump e ka bërë shumë të qartë se nuk është e pranueshme që India të vazhdojë të financojë këtë luftë përmes blerjes së naftës nga Rusia,” tha Stephen Miller, zëvendësshef i stafit në Shtëpinë e Bardhë, gjatë një interviste në Fox News, përcjell Reuters.
Komentet e Miller ishin ndër kritikat më të forta të administratës Trump ndaj Indisë deri më tani, ndërsa shtoi se “njerëzit do të tronditen kur të mësojnë se India është praktikisht e barabartë me Kinën në blerjet e naftës ruse. Kjo është një fakt befasues.”
Ambasada indiane në Uashington nuk dha menjëherë një reagim, por burime qeveritare në Nju Delhi i thanë agjencisë Reuters të shtunën se India do të vazhdojë blerjet e saj të naftës nga Moska, pavarësisht presioneve apo kërcënimeve amerikane.
Në shenjë ndëshkimi, të premten kanë hyrë në fuqi tarifa 25% për produktet indiane, si pasojë e blerjeve të Indisë të pajisjeve ushtarake dhe energjetike nga Rusia.
Presidenti Trump ka paralajmëruar gjithashtu vendosjen e tarifave deri në 100% për importet nga vendet që vazhdojnë të blejnë naftë ruse, nëse Moska nuk arrin një marrëveshje të madhe paqeje me Kievin.
Megjithatë, Miller e zbuti disi tonin kritik duke theksuar se marrëdhënia mes Trump-it dhe kryeministrit indian Narendra Modi është “e jashtëzakonshme”.
