Ukraina së shpejti do ketë aftësinë për të goditur objektiva brenda Rusisë, tha të mërkurën ministri i Jashtëm gjerman Johann Wadephul, duke paralajmëruar mundësinë e furnizimit nga Berlini me armë me rreze të gjatë veprimi, të cilat Moska i ka paralajmëruar se mund të përshkallëzojnë luftën.
Duke folur për Die Zeit, Wadephul nuk përmendi sisteme specifike, por duket se iu referua raketës Taurus – një armë me rreze të gjatë veprimi e aftë të godasë objektiva deri në 500 km larg, përfshirë brenda territorit rus.
“Ukraina gjithashtu do ketë mjetet për t’u kundërpërgjigjur në territorin rus,” tha ai.
“Megjithatë, ne nuk do ia zbulojmë presidentit rus Putin se cilat sisteme armësh po i ofrojmë Ukrainës.”
Wadephul shtoi se kishte qenë i kujdesshëm në lidhje me dhënien e mendimit në debatin Taurus, duke përmendur kompleksitetin teknik të raketës si arsyen e vonesës në marrjen e një vendimi, shkruan RT.
Moska ka paralajmëruar vazhdimisht se furnizimi i raketave Taurus do e bënte Gjermaninë një palë të drejtpërdrejtë në luftë. Zyrtarët rusë kanë kritikuar prej kohësh dërgesat e armëve perëndimore në Ukrainë, duke thënë se ato zgjasin armiqësitë dhe rrezikojnë një përplasje më të gjerë.
Berlini ka ndaluar deri tani furnizimin e sistemit Taurus në Kiev për muaj të tërë. Ish-kancelari Olaf Scholz e bllokoi transferimin, duke përmendur rrezikun e përshkallëzimit. Pasardhësi i tij, Friedrich Merz, ka deklaruar që atëherë se nuk është marrë asnjë vendim për këtë çështje.
Që nga marrja e detyrës në maj, Merz ka miratuar një qëndrim të ashpër ndaj Rusisë. Më herët këtë muaj, ai deklaroi se mundësitë diplomatike në luftën e krainës ishin “shteruar” dhe riafirmoi angazhimin e tij për të armatosur Ukrainën.
