Policia gjermane ka nisur një hetim ndaj një lojtari gjerman në Premierligën angleze pas akuzave se ka pëlqyer një video me inteligjencë artificiale që përshkruan dhunë në një paradë LGBTQ, raportoi Bild.
Videoja thuhet se tregon një makinë që përplaset me një turmë në një marshim LGBTQ, e shoqëruar me tekst që i referohet një pjese loje në Grand Theft Auto 6.
Një gjyqtar futbolli dhe krijues përmbajtjeje digjitale, biseksual, Pascal Kaiser, ka ngritur akuza për nxitje të urrejtjes kundër krijuesve të videos dhe portierit të Fulham dhe ish-portierit të Gjermanisë Bernd Leno për pëlqimin e saj, raportoi gazeta javën e kaluar, shkruan RT.
“Mjafton që video të tilla të neveritshme po qarkullojnë. Fakti që dikush si Leno i shpërndan ato duke i pëlqyer dhe duke tërhequr kështu vëmendjen ndaj tyre është, sipas mendimit tim, një skandal i mëtejshëm“, pohoi Pascal.
Pamjet e ekranit tregojnë llogarinë e verifikuar të Lenos në Instagram, e cila ka rreth 810,000 ndjekës, duke regjistruar një “Like” (Pëlqim) për videon. Ai më vonë e hoqi pëlqimin përpara se videoja të fshihej nga platforma.
Sipas medies, Kaiser fillimisht kontaktoi Lenon në një mesazh privat, duke pyetur pse një lojtar kombëtar kishte pëlqyer një përmbajtje të tillë, por raportet tregojnë se Leno e bllokoi atë. Më pas ai i inkurajoi mbështetësit të postonin emoji me flamuj LGBTQ në faqen e Lenos. Portieri thuhet se çaktivizoi komentet në përgjigje.
“Ne mund të konfirmojmë ankesën në këtë rast dhe se Siguria e Shtetit ka marrë përsipër hetimin,” tha një zëdhënës i policisë për Bild.
Agjencia e Lenos, fair-sport GmbH, lëshoi një deklaratë përmes medies, duke thënë: “Bernd është një person kozmopolit. Ai distancohet nga videoja, të cilën nuk e pëlqeu kurrë me vetëdije. Ai do punësojë një avokat.”
Leno, 33 vjeç, aktualisht luan për Fulham në Premier League dhe ka luajtur nëntë ndeshje për Gjermaninë, së fundmi kundër Lihtenshtajnit në vitin 2021.
