Legjenda e WWE, Hulk Hogan, ka ndërruar jetë në moshën 71-vjeçare, sipas raportimeve të para, përcjell The Sun.
Hogan, i lindur si Terry Gene Bollea, u gjet pa shenja jete në shtëpinë e tij në Clearwater, Florida, mëngjesin e së enjtes.
Sipas burimeve të TMZ, autoritetet u njoftuan për një rast të dyshuar arresti kardiak dhe menjëherë shkuan në vendngjarje.
Paramedikët dhe patrullat e policisë raportohet se ishin të pranishëm jashtë shtëpisë së tij në orët e para të mëngjesit. Hogan u nxor nga shtëpia mbi një barrelë dhe u transportua me ambulancë, por nuk dihet nëse kishte shenja jete në atë moment.
Policia e Clearwater nuk ka dhënë ende një koment zyrtar mbi rastin. Ndërkohë, nuk është bërë publik shkaku zyrtar i vdekjes, megjithëse gjendja e tij shëndetësore ishte përfolur gjerësisht javët e fundit.
Disa thashetheme sugjeronin se Hogan ishte në koma dhe në “shtrat vdekjeje”, por bashkëshortja e tij, Sky, i kishte mohuar këto pretendime, duke deklaruar se zemra e tij ishte “e fortë” dhe se ai po rikuperohej nga një ndërhyrje në qafë.
Një figurë legjendare e WWE
Hogan u bë një figurë ikonike në botën e mundjes gjatë viteve 1980, kur mori pjesë në World Wrestling Federation – tani World Wrestling Entertainment (WWE) – nën drejtimin e Vince McMahon. Ai shndërrohej në një simbol të kulturës pop amerikane, me paraqitjet e tij karizmatike, fizik të fuqishëm dhe fjalimet frymëzuese që krijuan fenomenin “Hulkamania”.
Vdekja e tij shënon fundin e një epoke për botën e mundjes, ku ai mbeti për dekada një nga figurat më të dashura dhe më të njohura ndërkombëtarisht.
Më shumë detaje pritet të bëhen publike në orët në vijim.
