Një kamikaze e dyshuar femër vrau të paktën 12 persona dhe plagosi disa të tjerë në një treg peshku të premten në mbrëmje në shtetin verilindor Borno të Nigerisë, tha policia.
Zëdhënësi i policisë së shtetit Borno, Nahum Kenneth Daso, tha në një deklaratë se një grua me një pajisje shpërthyese të improvizuar të lidhur në trupin e saj, infiltroi një turmë në tregun e peshkut përpara se ta shpërthente atë midis civilëve.
Daso tha se të plagosurit u dërguan në spital, shkruan Reuters.
Banorët vendas thanë se të paktën 30 persona u plagosën.
Shteti Borno është zemra e një kryengritjeje – kryesisht e drejtuar nga grupi i armatosur Boko Haram – që ka vazhduar për 16 vitet e fundit, duke vrarë mijëra njerëz dhe duke zhvendosur të paktën 2 milionë njerëz, sipas agjencive të ndihmës.
