Ekspertët e shpëtimit ngritën në sipërfaqe superjahtin e fundosur të Mike Lynch dhe filluan të nxjerrin ujin e detit prej tij të shtunën, 10 muaj pasi u fundos në brigjet e Siçilisë, duke vrarë manjatin britanik të teknologjisë, vajzën e tij adoleshente dhe pesë të tjerë.
Puna rifilloi me të gdhirë, me një nga vinçat detarë më të fuqishëm në Evropë që është përdorur për të tërhequr lart jahtin Bayesian 56 metra të gjatë, shkruan Reuters.
Kuvertat e sipërme dukeshin të dëmtuara rëndë, ndërsa trupi blu ishte i mbuluar me baltë.
Anija Bayesian ishte ankoruar pranë portit të vogël të Porticello-s, pranë Palermos, në gusht të vitit të kaluar kur u fundos gjatë një stuhie të papritur. Jahti mund të jetë përmbysur për shkak të erërave të forta gjatë një stuhie të papritur, tha një raport i përkohshëm britanik muajin e kaluar.
Anija do mbahet në një pozicion të ngritur gjatë fundjavës, ndërsa bëhen kontrolle dhe përgatitje, tha TMC Marine, e cila ka udhëhequr operacionin e shpëtimit, duke punuar me specialistët holandezë Hebo Maritiemservice për të ngritur jahtin 50 metra nga shtrati i detit gjatë ditëve të fundit.
Më pas pritet të transportohet në portin e afërt të Termini Imerese të hënën dhe t’u dorëzohet autoriteteve që po hetojnë fundosjen.
Procesi i rikuperimit është bërë më i lehtë pasi direku 72 metra i anijes u shkëput duke përdorur një mjet prerës me telekomandë dhe u vendos në shtratin e detit të martën.
Përveç Lynch, themeluesit të kompanisë së softuerëve Autonomy, vajza e tij Hannah, avokati Chris Morvillo dhe gruaja e tij Neda, bankieri Jonathan Bloomer dhe gruaja e tij Judy, dhe shefi i kuzhinës Recaldo Thomas u vranë kur jahti u fundos. Nëntë anëtarë të tjerë të ekuipazhit dhe gjashtë mysafirë u shpëtuan.
