Forcat e Mbrojtjes së Izraelit (IDF) njoftuan të premten se një sulm ajror izraelit, i kryer më herët gjatë kësaj jave, eliminoi Ali Saadi Wasfi al-Agha, një komandant të lartë të Brigadave të Mujahideen, i cili ishte i përfshirë në rrëmbimin, vrasjen dhe varrosjen e pengjeve izraelite Gadi Haggai dhe Judih Weinstein, përcjell The Times of Israel.
Al-Agha u vra të hënën në një strehë në Gaza qendrore. Sipas IDF-së, ai pritej të merrte drejtimin e grupit pas vrasjes së liderit të tij, Asaad Abu Sharia, në një tjetër sulm izraelit më herët këtë muaj.
Ushtria izraelite deklaroi se al-Agha kishte gjithashtu rol në aktivitete terroriste të drejtuara nga Irani, rekrutimin e militantëve dhe sulme kundër trupave izraelite.
Në një tjetër goditje të martën, IDF konfirmoi vrasjen e Ibrahim Abu-Shamala, kreut financiar të krahut ushtarak të Hamasit dhe bashkëpunëtor i Marwan Issa, ish-zëvendëskomandanti i vrarë në mars 2024. Abu-Shamala dyshohet se kishte kontrabanduar miliona dollarë për të financuar operacionet e Hamasit dhe për të paguar rrogat e luftëtarëve të tij.
Gjatë javës së fundit, Izraeli thotë se ka goditur mbi 300 objektiva terroriste në Gaza.
