Drejtori ekzekutiv i Open AI, Sam Altman, foli gjatë Samitit Snowflake 2025 në San Francisko në fillim të këtij muaji.
Tensionet midis OpenAI dhe Microsoft mbi të ardhmen e partneritetit të tyre të famshëm me IA-në po shtohen.
OpenAI dëshiron të lirojë kontrollin e Microsoft mbi prodhimet e saj të Inteligjencës Artificiale (IA) dhe burimet kompjuterike dhe të sigurojë bekimin e gjigantit të teknologjisë për shndërrimin e saj në një kompani fitimprurëse. Miratimi i kalimit nga Microsoft është çelësi për aftësinë e OpenAI-së për të mbledhur më shumë para dhe për t’u bërë publike.
Por negociatat kanë qenë aq të vështira sa në javët e fundit, drejtuesit e OpenAI-së kanë diskutuar atë që e shohin si një përplasje bërthamore: akuzimin e Microsoft-it për sjellje antikonkurruese gjatë partneritetit të tyre, thanë njerëz të njohur me çështjen. Kjo përpjekje mund të përfshijë kërkimin e rishikimit rregullator federal të kushteve të kontratës për shkelje të mundshme të ligjit antitrust, si dhe një fushatë publike, thanë njerëzit.
Një veprim i tillë mund të kërcënojë marrëdhënien gjashtëvjeçare të kompanive, e cila shihet gjerësisht si një nga partneritetet më të suksesshme në historinë e teknologjisë. Për vite me radhë, Microsoft nxiti rritjen e OpenAI-së në këmbim të qasjes së hershme në teknologjinë e saj, por të dyja palët që atëherë janë shndërruar në konkurrentë, duke e bërë më të vështirë gjetjen e një gjuhe të përbashkët.
“Ne kemi një partneritet afatgjatë dhe produktiv që ka ofruar mjete të mrekullueshme të inteligjencës artificiale për të gjithë”, thanë përfaqësuesit e të dy kompanive në një deklaratë të përbashkët. “Bisedimet janë duke vijuar dhe jemi optimistë se do vijojmë të ndërtojmë së bashku për vitet që vijnë.”
Drejtori ekzekutiv i Microsoft, Satya Nadella
OpenAI dhe Microsoft janë në një mosmarrëveshje për kushtet e blerjes prej 3 miliardë dollarësh të startup-it të kodimit Ëindsurf, thanë burimet. Microsoft tani ka qasje në gjithë IP-në e OpenAI, sipas marrëveshjes së tyre. Ai ofron produktin e vet të kodimit të IA-së, GitHub Copilot, i cili konkurron me OpenAI. OpenAI nuk dëshiron që Microsoft të ketë qasje në pronën intelektuale të Ëindsurf.
OpenAI ka një marrëveshje licencimi përmbajtjeje me kompaninë mëmë të The Ëall Street Journal, Neës Corp.
Kompanitë vijojnë të jenë në mosmarrëveshje për sa i përket sasisë së OpenAI që Microsoft do zotëronte nëse shndërrohet në një korporatë me përfitim publik. Microsoft tashmë po kërkon një pjesëmarrje më të madhe në kompaninë e re sesa OpenAI është e gatshme të japë, thanë njerëz të njohur me çështjen.
OpenAI duhet ta përfundojë kalimin deri në fund të vitit, ose rrezikon të humbasë 20 miliardë dollarë në fonde.
Nën administratën e Biden, Komisioni Federal i Tregtisë hapi një hetim të gjerë antitrust ndaj Microsoft vitin e kaluar. Gjithashtu, u shqyrtua investimi i Microsoft në OpenAI, së bashku me investime të tjera të mëdha teknologjike në IA më shumë se një vit më parë.
Microsoft investoi për herë të parë 1 miliard dollarë në OpenAI në vitin 2019. Sipas kontratës, gjiganti i teknologjisë ka të drejtën ekskluzive për të shitur mjetet softuerike të OpenAI përmes cloud-it të tij Azure dhe ka qasje të preferuar në teknologjinë e startup-it. Microsoft supozohet gjithashtu të jetë ofruesi i vetëm i kompjuterëve i OpenAI, megjithëse i lejoi startup-it të krijonte projektin e vet të qendrës së të dhënave, Stargate, vitin e kaluar.
Të dy tani konkurrojnë në produkte që variojnë nga chatbot-et e konsumatorëve deri te mjetet e IA-së për bizneset. Vitin e kaluar, CEO i Microsoft, Satya Nadella, punësoi një rival të Altman-it, i cili nisi një përpjekje sekrete për të ndërtuar modele për Microsoft-in.
Startup-i po përpiqet të rinegociojë elementët e asaj marrëveshjeje së bashku me konvertimin e tij të planifikuar. Ai dëshiron të bashkohet me ofrues të tjerë të cloud-it në mënyrë që të mund t’ua shesë teknologjinë e tij më shumë klientëve dhe të ketë qasje në burime shtesë kompjuterike. Ndërkohë, Microsoft dëshiron qasje në teknologjinë e OpenAI edhe pasi startup-i deklaron se modelet e tij kanë arritur inteligjencë njerëzore, gjë që do t’i jepte fund partneritetit aktual.
Ky nivel sofistikimi, i njohur si “inteligjencë e përgjithshme artificiale”, është subjekt i një debati të ashpër midis drejtuesve të teknologjisë. Disa besojnë se është e mundur dhe e afërt, ndërsa të tjerë besojnë se është larg ose potencialisht e paarritshme dhe se përmirësimet në inteligjencën artificiale ka të ngjarë të jenë graduale.
