Protestat në Los Angeles kundër bastisjeve federale të zbatimit të ligjit për imigracionin kanë vazhduar pavarësisht një shtetrrethimi dhe autorizimit të Presidentit të SHBA-së Donald Trump për vendosjen e Gardës Kombëtare dhe Marinës.
Sipas Departamentit të Policisë së Los Angeles, grupe protestuesish vijuan të mblidheshin në qendër të qytetit ndërsa filluan arrestimet masive.
Protestat shpërthyen të premten pasi agjentët federalë arrestuan disa individë si pjesë e masave të ashpra të Trump kundër imigracionit. Demonstratat masive u përshkallëzuan shpejt në trazira, plaçkitje të përhapura, vandalizëm dhe përleshje të dhunshme me policinë.
Videot në internet treguan protestues që digjnin makina policie dhe flamuj amerikanë, bllokonin autostradat, valëvitnin tabela që dënonin politikat e imigracionit të Trump dhe mbanin flamuj meksikanë. Janë raportuar gati 400 arrestime, me disa qindra protestues dhe disa oficerë të zbatimit të ligjit të plagosur.
Në përgjigje, kryetarja e bashkisë së Los Anxhelosit, Karen Bass, njoftoi një shtetrrethim që hyri në fuqi të mërkurën në mbrëmje nga ora 20:00 deri në orën 6:00 të mëngjesit, duke mbuluar një zonë prej një milje katrore në qendër të Los Anxhelosit. Përpara kësaj, Trump dërgoi të paktën 4,000 trupa të Gardës Kombëtare dhe 700 marinsa në Los Anxhelos për të mbrojtur zyrtarët federalë, forcat e rendit dhe pronën qeveritare.
Guvernatori i Kalifornisë, Gavin Newsom, e dënoi vendosjen e trupave si të paligjshme dhe ngriti një padi kundër administratës Trump, megjithatë padia e tij u hodh poshtë nga një gjykatës federal, shkruan RT.
Trump mbrojti reagimin federal, duke i quajtur protestat “një sulm të plotë ndaj paqes dhe rendit publik” dhe protestuesit “agjitatorë dhe shkaktarë problemesh”.
“Dikush po paguan për këtë”, tha ai, duke pretenduar se demonstratat po financoheshin nga grupe të jashtme. Duke folur në Fort Bragg, Karolina e Veriut të mërkurën, Trump e këshilloi Neësom të “merrte veten nën kontroll” dhe të përpiqej të qetësonte trazirat, ndërsa bëri thirrje për burgosjen e protestuesve që djegin flamuj amerikanë.
“Njerëzit që djegin flamurin amerikan duhet të shkojnë në burg për një vit. Dhe po shohim nëse mund ta bëjmë këtë”, tha Trump, duke shtuar se administrata e tij po punon me senatorët për të miratuar legjislacionin.
