Fatos Cenaj, një ish-polic shqiptar, është gjetur i plagosur me një plumb në kokë në një fshat të Italisë. Gjendja e tij mbetet e qëndrueshme, por shumë serioze për jetën. Prokuroria e Padovës ka hapur një hetim për vrasje të mbetur në tentativë dhe po shqyrton pista të ndryshme lidhur me ngjarjen.
Fillimisht, dyshimet ishin për një atentat të kryer nga një vrasës me pagesë për hakmarrje, por hetuesit tani po shqyrtojnë mundësinë e një plumbi të qëlluar aksidentalisht nga dikush që po testonte një armë. Skanimi i kryer në spital tregoi se plumbi ka hyrë pas veshit dhe ka dalë nga balli, por arma e përdorur ende nuk është identifikuar.
Familjarët e Cenajt kanë deklaruar se ai nuk ka pasur konflikte me askënd dhe nuk mund të imagjinojnë se kush mund ta ketë qëlluar. Deri para disa vitesh, ai ka punuar si polic në Shqipëri, ndërsa dy vjet e gjysmë më parë është zhvendosur në Itali për t’u bashkuar me gruan e tij. Hetimet po vazhdojnë për të zbuluar motivin dhe autorin e ngjarjes.
