Tuneli i Llogarasë u hap për qarkullim këtë të shtunë në orën 09:00, duke u bërë i kalueshëm për automjetet që udhëtojnë drejt Dhërmiut dhe zonave të tjera në jug të vendit. Tuneli, me një gjatësi prej 5.9 kilometrash, ka reduktuar ndjeshëm kohën e udhëtimit në segmentin Dukat–Palas, i cili më herët përshkohej për rreth 45 minuta. Pas hapjes, kjo rrugë përshkohet për rreth 7 minuta.
Kalimi përmes tunelit do të jetë pa pagesë deri më 15 shtator. Ai ka qenë i mbyllur prej vitit të kaluar për shkak të punimeve në tunelin e emergjencës.
Qarkullimi në këtë segment tashmë shmang kthesat e shumta të zonës malore të Llogarasë, duke lehtësuar lëvizjen e automjeteve dhe duke ulur kohën e udhëtimit.
Sipas autoriteteve, brenda tunelit është vendosur një shërbim zjarrfikës i cili do të qëndrojë në gatishmëri për çdo situatë emergjente.
