Presidenti amerikan Trump foli me Putinin e Rusisë për Ukrainën të hënën, pasi zv.presidenti Vance tha se Uashingtoni mund të largohet nga procesi i paqes dhe të arrijë në përfundimin se “kjo nuk është lufta jonë”.
Trump, i cili ka premtuar t’i japë fund luftës më vdekjeprurëse në Evropë që nga Lufta e Dytë Botërore, ka bërë thirrje në vijim për armëpushim pas vitesh në të cilat Uashingtoni iu bashkua vendeve të tjera perëndimore në armatosjen e Ukrainës, shkruan Reuters.
Nën presionin e Trump, delegatët nga vendet ndërluftuese u takuan javën e kaluar në Stamboll për herë të parë që nga viti 2022, megjithëse nuk ranë dakord për një armëpushim. Kievi thotë se është gati për një armëpushim tani kurse Moska thotë se së pari duhet të plotësohen kushtet.
Udhëheqësit evropianë kanë thënë se duan që Shtetet e Bashkuara t’u bashkohen atyre në vendosjen e sanksioneve të reja të ashpra ndaj Rusisë për kundërshtimin e armëpushimit. Udhëheqësit e Britanisë, Francës, Gjermanisë dhe Italisë folën me Trump të dielën përpara telefonatës së tij me Putinin.
