Një përfaqësues i Departamentit të Shtetit të SHBA, Joshua Simmons, deklaroi në Gjykatën Ndërkombëtare të Drejtësisë (ICJ) se nevojat urgjente të sigurisë së Izraelit tejkalojnë detyrimet për të ofruar ndihmë për palestinezët në Gaza. Ai theksoi se Izraeli nuk ka detyrim ligjor sipas Konventës së Gjenevës për të bashkëpunuar me UNRWA-n, agjencinë kryesore të OKB-së për refugjatët palestinezë, për shkak të shqetësimeve të tij lidhur me lidhjet e pretenduara të kësaj agjencie me Hamasin – akuza që janë hedhur poshtë nga shumë palë.
Deklarata e Simmons u bë gjatë ditës së tretë të seancave në Hagë, ndërkohë që ndihma për Gazën është ndaluar totalisht nga Izraeli për 60 ditë. Knesset-i izraelit ka miratuar që në tetor ndalimin e bashkëpunimit me UNRWA, çka ka çuar në ndërprerjen e operacioneve të saj.
Simmons tha se SHBA mbështet dërgimin e ndihmave humanitare në Gaza, por mohoi se Izraeli ka një detyrim absolut ligjor për ta lejuar këtë ndihmë, as si forcë okupatore dhe as si shtet anëtar i OKB-së. Ai argumentoi se një vendim i gjerë nga ICJ për përgjegjësitë e Izraelit mund të dëmtojë besueshmërinë e së drejtës ndërkombëtare.
“Interpretimet e reja ligjore nuk do ta zgjidhin konfliktin, nuk do të sjellin pengjet në shtëpi dhe nuk do të garantojnë një të ardhme më të mirë për izraelitët e palestinezët,” u shpreh ai.
Simmons theksoi se Izraeli ka të drejtë të mos lejojë agjenci specifike si UNRWA të veprojnë në territore të pushtuara nëse këto operacione cenojnë interesat e tij të sigurisë. Ai shtoi se Asambleja e Përgjithshme e OKB-së nuk ka juridiksion për të imponuar një detyrim të përhershëm bashkëpunimi me UNRWA.
Në dokumentin e tij zyrtar, Izraeli i ka kërkuar ICJ-së që të mos japë opinion përfundimtar mbi këtë çështje, duke argumentuar se nuk ka mjete të plota për të vlerësuar pretendimet dhe se ndihma humanitare nuk është një detyrim absolut. Në qëndrimin e tij, Izraeli e ka cilësuar rastin si pjesë të një “fushate abuzive që përdor të drejtën ndërkombëtare si armë kundër të drejtës së tij për vetëmbrojtje”.
Gjykimi në ICJ po zhvillohet nën drejtimin e presidentit të sapozgjedhur të gjykatës, Yuji Iwasawa, dhe do të zgjasë pesë ditë.
