Ministria e Mbrojtjes e Ukrainës ka mohuar raportet që sugjeronin se Kievi ishte “90% dakord” me kuadrin e paqes të prezantuar këtë javë nga Donald Trump në Paris.
Një raport i New York Post citoi një zyrtar të lartë të administratës Trump, i cili tha se ministri i Mbrojtjes i Ukrainës kishte pohuar se Kievi ishte afër arritjes së një marrëveshjeje paqeje.
Në një deklaratë për Sky News, Ministria e Mbrojtjes e Ukrainës e hodhi poshtë këtë informacion duke theksuar se ajo “nuk merr vendime politike” dhe nuk mund të kishte bërë “vlerësime në përqindje”.
“Ne kemi disa pozita parimore: ne e mbështetëm propozimin e SHBA për një armëpushim të plotë që në 11 mars, ndërsa Rusia nuk e mbështeti propozimin amerikan dhe vazhdon sulmet ditore mbi qytetet dhe infrastrukturën ukrainase”, tha Ministria.
“Në këto kushte, është e paqartë se si mund të diskutohet apo të matet përparimi i çdo dialogu në përqindje. Pyetja jonë kryesore është se si mund të sigurohet funksionimi dhe monitorimi i besueshëm i propozimit për armëpushim. Ne mbetemi në një dialog konstruktiv me partnerët tanë amerikanë dhe jemi plotësisht të angazhuar për të përfunduar këtë luftë.”
Në mes të këtyre zhvillimeve, një ekspert për Rusinë tha për Sky News se strategjia e administratës Trump për Ukrainën ka dështuar dhe mund të ketë përkeqësuar situatën. Ai shtoi se është bërë e qartë që strategjia ka dështuar dhe se pozitat e SHBA-ve janë përmbysur, duke kërkuar një ndryshim të qasjes për të arritur një zgjidhje.
